Qupııa qyzmet agenti Tramptyń saparynda jubaıyn jasyryn ushaqqa otyrǵyzbaq boldy

VAShINGTON. KAZINFORM – AQSh-tyń Qupııa qyzmeti óz qyzmetkerleriniń birine qatysty tergeý júrgizip jatyr. Ol AQSh prezıdenti Donald Tramptyń Shotlandııaǵa sapary kezinde jubaıyn qyzmettik ushaqqa otyrǵyzýǵa tyrysqan. Bul týraly brıtandyq The Daily Mail gazeti habarlady, dep jazady TASS.

Basylymnyń málimetinshe, agenttiń áıeli Vashıngton mańyndaǵy Endrıýs áskerı bazasyndaǵy joǵary laýazymdy tulǵalarǵa arnalǵan zalda baıqalǵan. Bul – ádette prezıdenttiń arnaıy borty ushatyn baza. Sonymen qatar, áıel Qupııa qyzmettiń aldaǵy saparǵa arnalǵan arnaıy brıfıngine qatysqany anyqtalǵan.

Óz kezeginde The Herald gazeti agenttiń jubaıyn Qupııa qyzmet qyzmetkerleri men qural-jabdyqtardy tasymaldaýǵa arnalǵan ushaqqa otyrǵyzýǵa tyrysqanyn jazdy. Basylym áıeldiń AQSh Áýe kúshterinde qyzmet etetinin de atap ótken. Alaıda, ushar sáttiń aldynda ony ushaqqa kirgizbeı qoıǵan.

AQSh prezıdentiniń Shotlandııaǵa sapary 25-29 shilde aralyǵynda ótti. Seısenbi kúni, Aberdınnen Vashıngtonǵa ushyp bara jatqanda, jýrnalıster Tramptan atalǵan oqıǵaǵa qatysty pikir surady.

– Qyzyq jaǵdaı eken. … Bul sál qaýipti emes pe? … Men bul týraly eki mınýt buryn ǵana estidim. Menińshe, Qupııa qyzmettiń jetekshisi Shon (Karran) bul máselemen aınalysady, – dedi AQSh prezıdenti.

Aıta keteıik, buǵan deıin AQSh prezıdenti Donald Tramp Irannyń ıadrolyq nysandary qaıta iske qosylatyn bolsa, olardy «saýsaǵyn kóterip úlgergenshe joıyp jiberemin» dep ses kórsetkenin jazdyq.