«Qupııa» grıfi bar - Antıkor Marat Beketaev pen «Bolashaq» bas dırektorynyń isi týraly pikir bildirdi

ASTANA. KAZINFORM – Májilis kýlarynda BAQ ókilderi Sybaılas jemqorlyqqa qarsy is-qımyl agenttigi tóraǵasynyń birinshi orynbasary Ulan Sarqulovtan eks-mınıstr Marat Beketaev pen «Bolashaq» bas dırektorynyń isin ne baılanystyratynyn surady.

«Bul isterdiń «Qupııa» grıfi bar, óıtkeni tórelik ister bolyp jatyr. Mıllıondaǵan dollar syrtqa ketip, tıisti jumsalmaǵandyqtan, memleketke zııan kelgendikten, bul is tergelip jatyr», - dedi ol.

«Burynǵy Ádilet mınıstri Marat Beketaev pen «Bolashaq» bas dırektoryna qarsy ister eki túrli is pe, álde bir is pe?» - dep surady jýrnalıst. Agenttik ókili bul ister qupııa bolǵandyqtan ashyp aıta almaıtynyn jetkizdi.

«Bul ister qupııalandyrylǵan. Qazir ol ister ártúrli nemese bir is dep aıta almaımyn. Ol isterge mindetti túrde quqyqtyq baǵa beremiz», - dep qaıyrdy Ulan Sarqulov.

Eske sala keteıik, burynǵy Ádilet mınıstri byltyr qazanda laýazymdyq ókilettigin asyra paıdalandy degen kúdikpen ustalǵan edi. Antıkordyń málimetinshe, ol talap etilmeıtin qyzmetterdi kórsetýge jyl saıynǵy kelisimsharttar jasaý arqyly úlestes kompanııanyń múddesin qoldaǵan. Eks-sheneýnikti qamaýda ustaý merzimi birneshe ret uzartyldy. Sońǵy ret bıyl 21 mamyrda 2024 jylǵy 21 maýsymǵa deıin qamaý sanktsııalandy. Al 12 shildede Antıkor ádilet mınıstrine jáne basqa da qatysy bar tulǵalarǵa qatysty sotqa deıingi tergep-tekserý aıaqtalǵanyn málim etti.