«Qupııa aqparatty jarııalady» dep aıyptalǵan qyzylordalyq sotta jeńdi
QYZYLORDA. KAZINFORM — Qyzylorda soty bir seriktestikte 16 jyl boıy baqylaýshy-mehanık bolyp eńbek etken azamattyń eńbek quqyǵyn qorǵady.
Oblystyq sottyń baspasóz qyzmeti habarlaǵandaı, kásiporynnyń áleýmettik máseleleri jónindegi keńeste ol sol kezdegi kásipodaq komıtetiniń tóraǵasy retinde jumysshylardyń eńbek jáne áleýmettik máselelerine qatysty pikir bildirgen.
— Osy keńesten keıin jumys berýshi er adamdy kásiporynnyń qupııa aqparatyn jarııalady dep eseptep, oǵan qatań sógis túrindegi tártiptik jaza qoldanǵan. Er adam bul buıryqpen kelispeı, kelisý komıssııasyna júgingen. Alaıda, komıssııa daýystardyń teń túsýine baılanysty daýdy sot tártibimen sheshý quqyǵyn túsindirgen. Sonymen qatar memlekettik eńbek ınspektsııasy jumys berýshi tarapynan eńbek zańnamasy talaptarynyń buzylǵanyn anyqtap, olardy joıý týraly uıǵarym engizgen. Sotta er adamnyń qupııa aqparatpen jumys isteýge ruqsaty bolmaǵany, jarııa etildi delingen málimetterdiń zańmen qorǵalatyn qupııa aqparat ekeni dáleldenbegeni, naqty qandaı aqparattyń kimge jáne qandaı jaǵdaıda jarııalanǵany qyzmettik tekserý qorytyndysynda kórsetilmegeni anyqtaldy, — delingen habarlamada.
Sonymen qatar onyń áreketinen kásiporynǵa qandaı da bir zalal kelmegen.
— Sot er adamnyń tártiptik teris qylyq jasaǵany dáleldenbegen degen qorytyndyǵa kelip, tártiptik jaza qoldaný týraly buıryqty zańsyz dep tanyp, onyń kúshin joıdy. Qyzylorda oblystyq sotynyń azamattyq ister jónindegi sot alqasy birinshi satydaǵy sottyń sheshimin ózgerissiz qaldyrdy, -delingen habarlamada.
Aıta keteıik, Qazaqstanda azamattar memlekettik organdardyń sheshimderimen kelispegen jaǵdaıda óz quqyqtary men zańdy múddelerin ákimshilik sot arqyly qorǵaı alady.
