Quny arzan sheteldik avtokólikterdi alyp kelý aqsha urlaýdyń keń taraǵan shemasyna aınaldy
ASTANA. Mamyrdyń 20-sy. QazAqparat /Ernur Aqanbaı/ - Qazirgi tańda quny arzan sheteldik avtokólikterdi alyp kelý ańqaý azamattardyń aqshasyn urlaýdyń keń taraǵan shemalarynyń biri bolyp otyr.
Bul týraly búgin Astanadaǵy brıfıngte QR Ekonomıkalyq qylmysqa jáne sybaılas jemqorlyqqa qarsy kúres agenttiginiń (qarjy polıtsııasy) resmı ókili Murat Jumanbaı málim etti.
M. Jumanbaıdyń aıtýynsha, Astana qalasynda Jaqypov degen azamat múlkin tárkileýmen 6 jyl bas bostandyǵynan aıyryldy. Ol AQSh-tan avtomobılderdi alyp kelemin degen jalǵan sózben birneshe azamattyń 14 mln.teńgesin ıemdenip ketken. Al Shyǵys Qazaqstan oblysynda Boıko-Borodın degen azamat 7 jylǵa sottalǵan. Ol Polsha men Germanııadan kólik jetkizemin degen aldaýmen 20 azamattyń 21 mln.teńgege jýyq aqshalaı qarajatyn ıemdenip ketken.
