Quny 580 myń teńgeniń janar maı satyp alýǵa arnalǵan jalǵan talondaryn ótkizbek bolǵan qaraǵandylyq eki azamat ustaldy
ASTANA. Jeltoqsannyń 7-si. QazAqparat /Aıdar Ospanalıev/ - Jeltoqsannyń 1-i men 6-sy aralyǵynda respýblıkada 1 myń 750 qylmys tirkelip, onyń 1 myń 320-nyń izi sýymaı ashyldy.
Bul týraly búgin jýrnalıstermen bolǵan aptalyq brıfıngte Іshki ister mınıstrligi Til saıasaty jáne aqparat departamentiniń bastyǵy Qýanysh Jumanov málim etti, dep habarlaıdy QazAqparat.
Onyń málimetterine qaraǵanda, atalmysh merzimde izdeýde júrgen 49 qylmysker qolǵa túsken. Sondaı-aq esirtkimen baılanysty 119 qylmystyń beti ashylyp, 40 keliden astam esirtki tárkilengen. Buǵan qosa esirtki saýdalaǵany úshin izdeýde júrgen 32 adam qolǵa túsken. «Kókshetaý stansysynda Shý qalasynyń turǵyny ustalyp, odan 10 keli marıhýana tárkilendi. Al Aqmola oblysy Aqkól aýyly turǵynynyń kóliginen 16 keli marıhýana, Qyzlorda oblysy turǵynynyń kóliginen 50 kılá marıhýana alyndy», dedi departament bastyǵy.
Sondaı-aq qaraǵandylyq tártip saqshylary quny 580 myń teńge turatyn AI-95 janar maıyn alýǵa arnalǵan jalǵan talondar satyp júrgen eki azamatty ustady.
