Quny 560 mıllıon teńgeden asatyn zergerlik buıymdardy elge zańsyz kirgizbek bolǵan adam ustaldy

ASTANA. QazAqparat – QR Qarjy monıtorıngi agenttigi Astana qalasy boıynsha departamentiniń qyzmetkerleri elordanyń halyqaralyq áýejaıynda Ystanbuldan Qazaqstanǵa salmaǵy 28 keliden asatyn 7178 kontrabandalyq zergerlik buıymdardy ákelmek bolǵan azamatty ustady.

Bul týraly QazAqparat QR Qarjy monıtorıngi agenttiginiń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, bul fakt Eýrazııalyq ekonomıkalyq odaqtyń kedendik shekarasy arqyly ótkizýge shektelgen taýarlardy, zattar men qundylyqtardy ótkizý erejelerine qaıshy keledi, olar úshin ótkizýdiń arnaıy erejeleri belgilengen.

Mamandardyń aıtýynsha, deklaratsııalanbaǵan «zergerlik buıymdardyń» jalpy kedendik quny 560 mıllıon teńgeden asty. Ekonomıkalyq kontrabanda faktisi boıynsha qylmystyq is sotqa joldandy.