Quny 24,8 mln. teńge kólemindegi zergerlik buıymdardy alyp ótpek bolǵan azamatshanyń isi sotqa joldandy- Qarjy polıtsııasy
ASTANA. 7 sáýir. QazAqparat /Aınur Kenebaeva/ - Quny 24,8 mln. teńge kólemindegi deklaratsııaǵa enbegen zergerlik buıymdardy alyp ótpek bolǵan azamatshanyń isi sotqa joldandy.
Bul týraly búgin Astana qalasy qarjy polıtsııasy departamentinde ótken baspasóz máslıhaty barysynda málim boldy.
Qarjy polıtsııasy qyzmetkerleri málim etkendeı, aıyptalýshy tulǵa ótken jyly «Ystambul-Astana» halyqaralyq reısimen ushyp kelip, kedendik baqylaýdan quny 24,8 mln. teńge kólemindegi deklaratsııaǵa enbegen zergerlik buıymdardy, sonyń ishinde 243 dana júzik, 275 dana moıynǵa taǵatyn baý, 82 dana túıreýish, 331 dana alqa ilgishteri, 222 dana syrǵa, 65 dana bilezik, 20 dana qaptama, 100 dana syrǵa-júzik, 2 dana galstýkke taǵatyn qysqyshty zańsyz alyp ótpek bolǵan.
Quny iri kólemdi somany quraıtyn zattardy deklaratsııaǵa engizbeı jasyryn alyp ótpek bolǵan azamatshany kedendik shekaradan ótý barysynda QR Ulttyq qaýipsizdik komıtetiniń saqshylary ustaǵan.
