Kúntizbede «Dúnıejúzilik shyryn kúni» paıda bolýy múmkin

Bul týraly búgin Almatyda ótken baspasóz máslıhatynda osyndaı kúnniń qabyldanýyn usynyp otyrǵan otandastarymyz, «Qazaqstandyqtardy shyrynmen saýyqtyrý» qoǵamdyq qozǵalysynyń ókilderi málim etti.

«Bul bastama byltyrǵy jyly kóterilgen edi. Qazirgi tańda álemde basqa salalarǵa arnalǵan ataýly merekeler kóp, alaıda shyryn kúni joq bolyp shyqty. Shyrynnyń adam aǵzasyna áseri mol. Ony qarapaıym adamdardan bastap, dańqty sportshylar da jattyǵýlarda, saıystarda paıdalanady. Sondyqtan bıylǵy jyldyń basty sporttyq sharasy 7-Qysqy Azııa oıyndary qarsańynda bul bastamany jurtshylyqtyń nazaryna usynýdy jón kórdik»,- deıdi «Qazaqstandyqtardy shyrynmen saýyqtyrý» qozǵalysynyń baspasóz hatshysy Denıs Ibragımov.

Onyń aıtýynsha, bul bastamany qoldaýshylar www.worlddjuiceday.kz saıtyna kirip daýys bere alady. Uıymdastyrýshylardyń aıtýynsha, daýys berýshiler sany kóbeıgen saıyn ataýly kúnniń paıda bolý múmkindigi joǵary bolmaq.

«Arnaıy saıt 2010 jyldyń qarasha aıynda iske qosylǵan bolatyn. Qazirge deıin myńdaǵan adam daýys berdi. «Bizdi qoldap otyrǵandardyń qatarynda Qazaq taǵamtaný akademııasy, Salaýatty ómir saltyn qalyptastyrý Ulttyq ortalyǵy, ataqty alpınıst Denıs Ýrýbko, sý polosy boıynsha jattyqtyrýshylar Sergeı Drozdov, Alan Balfanbaev, olımpıada chempıony Olga Shıshıgına bar. Olar shyrynnyń paıdasyn jaqsy biletin mamandar. Sondyqtan jobamyzǵa qyzý qoldaý kórsetýde»,- deıdi D.Ibragımov.

Onyń aıtýynsha, atalǵan kúnniń qabyldanýy Qazaqstan ımıdjiniń kóterilýine úles qosady. «Óıtkeni bastama Qazaqstan tarapynan shyǵyp otyrǵandyqtan, jyl saıyn onyń aty atalady. Sondyqtan otandastarymdy atalǵan kúnniń qabyldanýy úshin daýys berýge shaqyramyn»,- deıdi uıymdastyrýshy top ókili.