Kúnsulý Zakarıa: QazSovid-in koronavırýstyń barlyq shtamdaryna tıimdi
NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide mamandarǵa QazSovid-in vaktsınasy halyqty jańa mýtatsııalardan qalaı qorǵaıdy degen saýal qoıyldy, dep habarlaıdy QazAqparat.
BAQ ókiliniń saýalyna jaýap bergen Bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarıa otandyq ónimdi brıtandyq jáne ońtústikafrıkalyq shtamdarǵa qarsy synaý bastalǵanyn jetkizdi.
«Almaty qalasyndaǵy naýqastardyń patologııalyq materıaldaryn alǵan bolatynbyz. Qazir zerthanada zertteý júrgizip jatyrmyz. Búginge deıin bizdiń ǵalymdar brıtandyq shtamdy da, ońtústikafrıkalyq shtamdy da bólip shyǵardy. Aıtpaqshy, biz patologııalyq materıaldy 19 naýryzda ǵana alǵan bolatynbyz. Osyndaı qysqa ýaqytta shtamdardy bólip shyǵardyq. Qazir osy shtamdardyń genetıkalyq, bıologııalyq qasıetteri zerttelip jatyr. Ol bizge keleshekte vaktsınanyń áldeqaıda jetildirilgen túrilerin jasaıtyn tehnologııaǵa paıdalaný úshin kerek. Bul tehnologııa uzaq ýaqyt júredi. Qazir bir sony bastap kettik», - deıdi ǵalym.
Ol sondaı-aq, otandyq vaktsınanyń quramynda vırýstyń barlyq aqýyzy bar ekenin málim etti. Al nanotehnologııa boıynsha jasalǵan vaktsınalarda vırýstyń bir bólshegi ǵana alynǵan.
«QazSovid-in vaktsınasy tutas vırýstan jasalǵanyn túsiný kerek. Onyń quramynda vırýstyń aqýyzdarynyń tolyq jıyntyǵy bar. Osynyń arqasynda ımmýnıtet qalyptastyrý aıasy óte keń. Qazir belgili bolǵan, keıin paıda bolýy múmkin shtamdardyń barlyǵyna qarsy tıimdi», - dedi ınstıtýt dırektory.
