Kún tutylatynyna baılanysty Maıorkada tótenshe jaǵdaı jarııalanyp, aralǵa ásker jiberildi
ASTANA. KAZINFORM — Maıorka araly 12 tamyzda bolatyn tolyq kún tutylýyna daıyndalyp jatyr. Týrısterdiń kóptep kelýi boljanyp, aralda tótenshe jaǵdaı jarııalanyp, Ispanııa úkimeti qaýipsizdikti qamtamasyz etý úshin áskerı qyzmetshilerdi jiberdi, dep habarlaıdy BILD.
Áskerıler 10-14 tamyz aralyǵynda birneshe mýnıtsıpalıtette polıtsııaǵa kómektesedi. Olardyń mindetine jol qozǵalysyn baqylaý, qutqarý qyzmetterine arnalǵan joldardyń ashyq bolýyn qamtamasyz etý jáne araldy orman órtterinen qorǵaý kiredi. Jergilikti bılik kólik qozǵalysynyń qıyndaýy men qaýipsizdikke tónetin qaterdiń artýynan alańdap otyr.
Budan bólek, Ispanııa boıynsha Azamattyq gvardııanyń shamamen 24 myń qyzmetkeri jumyldyrylady. Olar kólik qozǵalysyn rettep, kún tutylýyn tamashalaıtyn oryndardaǵy qaýipsizdikti qamtamasyz etedi jáne turǵyndardyń qaýipsizdigin qadaǵalaıdy.
Tolyq qarańǵylyq úsh mınýtqa sozylady
Maıorkada kún tutylýy jergilikti ýaqyt boıynsha shamamen 19:37–de bastalady. Aldymen ishinara tutylý kezeńi ótip, shamamen 20:30–da tolyq tutylý bastalady. Ol 20:33 shamasynda aıaqtalady. Odan keıin ishinara tutylý kezeńi 20:53–ke deıin jalǵasady.
Osylaısha, kún tutylýynyń barlyq kezeńi bir saǵattan sál asady, al tolyq qarańǵylyq shamamen úsh mınýtqa ǵana sozylady. Kún tutylýy kún batardan sál buryn bolatyndyqtan, Kún kókjıekke óte jaqyn ornalasady. Bul tabıǵı qubylysty tamashalap, áserli sýretter túsirýge qolaıly jaǵdaı týǵyzady.
Tolyq kún tutylýyn Valensııada, Kastılııa jáne Leonda, Galısııada jáne Bask elinde de kórýge bolady.
Buǵan deıin halyqaralyq zertteýshiler toby Kún betiniń buryn-sońdy bolmaǵan aıqyndyqtaǵy fotolaryna qol jetkizgen bolatyn.
