Kún kúrt buzylyp, Almatynyń kommýnaldyq qyzmetteri kúsheıtilgen rejımge kóshti

ALMATY. KAZINFORM – Almatyda aýa raıynyń buzylýyna baılanysty, kommýnaldyq qyzmetter kúsheıtilgen rejımge aýystyryldy.

«Qazgıdromet» RMK málimetinshe, 18 mamyr kúni saǵat 13:00-den bastap táýlik sońyna deıin naızaǵaı oınap, qatty nóser jańbyr men burshaq jaýady.

Jaýyn-shashyn mólsheri 20 mm-ge deıin jetýi múmkin. Jel batystan, soltústik-batystan 3–8 m/s jyldamdyqpen soǵyp, naızaǵaı kezinde ekpini 18–23 m/s deıin jetedi.

19 mamyrda da aýyspaly bultty aýa raıy saqtalady. Túnde saǵat 05:00-ge deıin jańbyr jaýýy múmkin, kúndiz jaýyn-shashynsyz. Aýa temperatýrasy túnde +13+15°S, kúndiz +20+22°S. Jel ońtústik-batystan 3–8 m/s.

– Qalanyń kommýnaldyq qyzmetteri kúsheıtilgen rejımge aýystyryldy. Túngi ýaqytta 366 arnaıy tehnıka 355 jol jumysshysy jumyldyryldy. Al 18 mamyr kúndiz sý basýdyń aldyn alý jáne joıý úshin 515 tehnıka, 27 motopompa jáne 755 jumysshy qala kóshelerine shyǵady. Sonymen qatar, motopompalarmen jabdyqtalǵan 42 jedel brıgada daıyndyq rejıminde jumys isteıdi, – dep habarlady ákimdikten.

Aryq jelileri men jaýyn sýyn qabyldaıtyn jerrlerdi tazalaý jáne baqylaý jumystary erekshe baqylaýǵa alynady.

Qaladaǵy problemalyq ýchaskelerde táýlik boıy tazalaý jumystary júrgizilip jatyr.

Budan bólek, Almaty qalasy qutqarý qyzmeti tarapynan 15 tehnıka men 50 qyzmetker, al TJD-dan 55 tehnıka 245 maman jumyldyryldy.

Osyǵan deıin Tótenshe jaǵdaılar departamenti aptap ystyqqa baılanysty Almaty turǵyndaryna úndeý jasaǵan bolatyn.