Kúnniń qýatty jarqylynan keıin paıda bolǵan úsh plazma bulty Jerge qaraı jaqyndap keledi

ASTANA. KAZINFORM — Kún plazmasy shyǵaryndysynyń birinshi fronty L1 Lagranj núktesindegi ǵarysh apparaty arqyly ótip, Jerge qaraı jyljyp keledi. Aldaǵy 24 táýlik ishinde taǵy eki qýatty soqqy kútilip otyr, dep habarlaıdy RǴA Ǵaryshtyq zertteýler ınstıtýtynyń Kún astronomııasy zerthanasy. 

Jerden 1,5 mln shaqyrym qashyqtyqta ornalasqan L1 Lagranj núktesinde (Jer men Kúnniń gravıtatsııalyq áreket etý kúshi tepe-teńdik ornaıtyn aımaq) ornalasqan spýtnıkterden alynǵan derekterge sáıkes, ǵarysh apparaty arqyly X1.7 klasyndaǵy jarqyldan keıin 9 qarashada Kún shyǵarǵan plazmanyń alǵashqy fronty ótti. 

Aldaǵy táýlik ishinde Jerge taǵy eki plazma bulty jaqyndaıdy, olardyń árqaısysy aldyńǵysynan kúshtirek bolady dep boljanyp otyr. Sońǵysy 10 qarashada tirkelgen osy jyldyń X5.15 eń qýatty jarqylymen baılanysty.

Jerge áser etý boljamy belgisiz bolyp qala beredi jáne kóptegen faktorlar: ǵalamsharǵa baǵyttalǵan buryshy, zattyń jáne magnıt óristeriniń taralýy jáne jekelegen plazma bulttarynyń birtutas qurylymǵa birigý múmkindigine baılanysty bolyp otyr. 

— Qazirgi ýaqytta eń kóp alańdaýshylyq aǵymdaǵy 25-shi kún tsıklinde eń joǵary ólshengen jyldamdyqqa ıe jáne Jerdiń magnıtosferasyna erekshe kúshti soqqy berý múmkindigi bar úshinshi shyǵaryndyǵa qatysty bolyp otyr, — delingen málimdemede.

Esepteýler boıynsha, alǵashqy plazma bulty Jerge Astana ýaqytymen tańǵy saǵat 4:00 shamasynda jetken. Kúni boıy odan ári soqqylar kútilip otyr, biraq onyń naqty ýaqyty men aýqymy ázirge boljap bolmaıtyn kúıinde qalyp otyr. 

Buǵan deıin Kún betinde 2025 jylǵy eń qýatty jarqyl bolǵanyn jazǵan edik.