Kúnniń belsendi aımaǵy aldaǵy eki kúnde Jerge áser etýi múmkin

ASTANA. KAZINFORM – Aldaǵy eki táýlikte Kúnniń belsendi 4917 aımaǵy Jer úshin negizgi qaýip kózi bolýy múmkin, dep habarlaıdy Kazinform TASS agenttigine silteme jasap.

Reseı Ǵylym akademııasynyń Qoldanbaly astronomııa ınstıtýty men Sibir bólimshesiniń ǵaryshtyq zertteýler ınstıtýty mamandarynyń málimetinshe, aımaq tikeleı Jerge baǵyttalyp otyr. Ol ortalyq kún merıdıanynda ornalasqan jáne sońǵy kúnderi jyldam ósip, aýqymdy aýmaqty qamtyǵan.

Ǵalymdar bul aımaqtyń tizimine Beta-Gamma-Delta sanaty berilgenin atap ótti. Bul onyń kúrdeli qurylymyn jáne joǵary belsendiligin bildiredi. Buǵan deıin ol Beta-Gamma sanatynda turǵan.

«Aımaqta úlken energııa qory jınalǵanyna qaramastan, ázirge Jerge qaraı qýatty jarqyl tirkelgen joq. Degenmen, kún táji aımaǵy qatty qyzyp tur. Sonyń saldarynan onyń jylýlyq sáýlelenýi sońǵy kúnderi úsh-bes ese artty», – dep habarlady mamandar.

Ázirge jaǵdaı baqylaýda bolǵanymen, ǵalymdar aldaǵy kúnderi osy aımaqtan eleýli jarqyldardyń bolýy yqtımal ekenin joqqa shyǵarmaıdy.

Aıta keteıik, Qytaıdyń «Shenchjoý-20» kemesiniń ekıpajy ǵaryshqa úshinshi ret attanbaqshy.