Kúnnen shyqqan qýatty jarqyldar aldaǵy ýaqytta Jerge áser etýi múmkin
ASTANA. KAZINFORM – Kúnde M klasty eki kúshti jarqyl tirkeldi, onyń ishinde sáýir aıyndaǵy eń qýattysy – M4.3 deńgeıindegi jarqyl boldy. Ǵalymdar aldaǵy táýlikterde odan da kúshti plazmalyq laqtyrýlar bolýy múmkin ekenin eskertip otyr. Bul týraly Reseı Ǵylym akademııasy janyndaǵy Ǵaryshtyq zertteýler ınstıtýty málimdedi.
Instıtýttyń Kún astronomııasy zerthanasynyń málimetine súıensek, bul sáýir aıynyń basynan bergi eń qýatty kún jarqyly sanalady. Oqıǵa M4.3 deńgeıine jetip, osy aıdaǵy eń joǵary kórsetkishke aınalǵan.
Zerthananyń habarlaýynsha, aldaǵy táýlikterde juldyz belsendiligi odan ári kúsheıýi múmkin. Ǵalymdar odan da joǵary klastaǵy, tipti eń joǵarǵy sanattaǵy jarqyldardyń bolýy yqtımal ekenin aıtady.
Buǵan deıin mamandar eki aptadan keıin alǵash ret M1.65 deńgeıindegi jarqyldy tirkegen. Ol birden eki belsendi aımaqta bolǵan jáne aldyn ala baǵalaý boıynsha Jerge aıtarlyqtaı áser etpeıdi.
Alaıda bul aımaqtar birtindep Kún dıskisiniń kórinetin ortalyǵyna qaraı jyljyp keledi. Bul bolashaqtaǵy plazmalyq laqtyrýlardyń Jerge áser etý yqtımaldyǵyn arttyrady.
Kún jarqyldary rentgen sáýlelený deńgeıine qaraı A, B, C, M jáne X sanattaryna bólinedi.
Sońǵysy – X klasy. Ol eń qýatty bolyp sanalady jáne ol Jerdegi baılanys júıelerine, navıgatsııaǵa jáne energetıkalyq ınfraqurylymǵa áser etetin kúshti geomagnıttik daýyldardy týdyrýy múmkin.
Mamandar baqylaýdy jalǵastyryp jatyr jáne aldaǵy kúnderi bul úderisterdiń odan ári kúsheıýin joqqa shyǵarmaıdy.
Aıta keteıik, apta buryn aldaǵy kúnderi Jerge magnıttik daýyl soǵatynyn habarladyq.
