Kúnnen asa iri plazmalyq bult bólinip shyqty
ASTANA. KAZINFORM — Kúnde kólemi shamamen 500 myń shaqyrym bolatyn iri plazmalyq bulttyń bólinip shyqqany tirkeldi. Bul týraly Reseı Ǵylym akademııasy Ǵaryshtyq zertteýler ınstıtýty men Sibir bólimshesiniń Kún-jer fızıkasy ınstıtýtynyń Kún astronomııasy zerthanasy habarlady, dep jazady BelTA.
— Kólemi jarty mıllıon shaqyrymǵa jýyq óte iri Kúnniń betindegi plazmalyq bult bólinip shyqqan sáti birden birneshe ǵarysh teleskopynyń kamerasyna túsip qaldy, — delingen habarlamada.
Bul — Kúnniń betinde qalqyp turatyn sýyq gaz bulttary. Olar kóbine juldyz betinen ondaǵan, tipti júzdegen myń shaqyrym bıiktikte ornalasady. Bul gaz bulttary magnıt órisiniń kúsh syzyqtarymen shyrmalyp, solardyń áserinen bir orynda turaqtap turady. Sonymen qatar ýaqyt óte kele kólemi ulǵaıa beredi. Keıde olardyń uzyndyǵy júzdegen myń, sırek jaǵdaıda mıllıon shaqyrymǵa deıin jetedi.
Protýberanetster Kún tájiniń tabıǵı qurylymyna jat bolǵandyqtan, juldyz olardan arylýǵa tyrysyp, ǵaryshqa laqtyrady. Mundaı qubylystar magnıttik daýyldarǵa sebep bolýy múmkin. Alaıda bul joly plazmalyq bult Jerge qaraı emes, búıir baǵytqa qaraı qozǵalyp barady. Mamandardyń boljaýynsha, onyń jolynda Mars bolýy múmkin.
Soǵan qaramastan, protýberanets Jerge de áser etýi yqtımal. Biraq onyń saldary aıtarlyqtaı bolmaıdy dep boljanyp otyr.
Buǵan deıin qazan aıynyń sońynda Jerde magnıttik daýyl bolýy múmkin ekenin jazǵan bolatynbyz.
