Kúnine úsh saǵat sportpen shuǵyldanamyn — 77 jastaǵy Káýııa apa

ASTANA. KAZINFORM — Sońǵy ýaqytta artyq salmaq búkil álemge ortaq máselege aınaldy. Mamandar buǵan qozǵalystyń tym azdyǵy sebep deıdi. Al 80-ge taıaǵan shaǵynda sport zalynda jattyǵyp, salaýatty ómir saltyn ustanatyn qarııany kórgen be edińiz? Fıtnespen aınalysyp, denesin shynyqtyryp júrgen 77 jastaǵy Káýııa Omarova Jibek Joly arnasynyń «Búgin LIVE» baǵdarlamasyna suhbat berdi.

— Men 1948 jylǵy týǵanmyn. Ózim jas kezimnen sportty jaqsy kóremin. Ákem soǵystan oralǵan soń, bizdi atqa jıi mingizetin. Men kip-kishkentaı bolsam da, atta erkin shaýyp, er bala sekildi shymyr bolyp óstim. Qurdastarymmen oınap, tóbelesetin edik. Sol kezde olardyń bárin jeńip tastaıtynmyn. Tehnıkýmda oqyǵan kezimde gımnastıkaǵa qatystym. Elde veterınarııa salasyn oqydym. Zootehnık te erkektiń jumysy ǵoı. Atty da, traktordy da tizgindedim. Solaı myqty bolyp óstim, — deıdi stýdııa qonaǵy.

Káýııa apa Astanaǵa qonys aýdarǵan balalaryna erip kelgen. Qarııa elordaǵa kóshken soń tórt qabyrǵada qamalyp otyra almaǵanyn aıtady.

— Balalarym elordaǵa kóshken soń, biz de artynan keldik. Maldyń sońynda júgirip, ot jaǵyp, aýyr tirliktiń bárin istep úırengenmin. Al munda ondaı jumys joq bolǵan soń, qur jatpaı aýladaǵy sporttyq alańqaıǵa baryp, sportpen shuǵyldana bastadym. Sol kezderi bir jazda bir qyz: «Apa, sizdi túsirip alýǵa bola ma?» dedi. Men kelisimimdi berdim. Basynda «Anasyna aparyp, meni kórsetkisi kelgen bolar» dep oıladym. Sóıtsem, ol qyz jýrnalıst eken. Mine, sol 72 jasymnan beri juldyz boldym, — deıdi Káýııa Omarova.

Bastapqyda sporttyq alańqaıda jattyǵyp júrgen ol keıin arnaıy fıtnes ortalyqqa baryp, dene shynyqtyra bastapty.

— Bıyl fıtnes klýbqa barmaı júrgen edim. Bir kúni qyzym sport zalyna bir aıǵa abonement utyp alyp, «Meniń ýaqytym joq, siz baryńyz, jaqsy kóresiz ǵoı» dep maǵan berdi. Sodan beri zalǵa baryp júrmin. Zalda jattyqqan qatty unaıdy. Keıde 1-2 kún bara almaı qalamyn, áıtpese kúnde baryp, úsh saǵat jattyǵý jasaımyn. 1 saǵat aýyr temir kóteremin, 1 saǵat sozylý jattyǵýlaryn jasaımyn, 45 mınýt júzemin, — deıdi ol.

Stýdııa qonaǵy júzýmen bala kúninen aınalysady eken.

— Týǵan jerim — Petropavl oblysy, Aqjar aýdany, Voshod aýyly. Onda kishkentaı kól bolatyn. Bizge sısa sóılekti tigip berip, sonymen sýǵa túsip, júzýdi úırendik. Sol ádetimmen qazir de basseınge kúmp berip, júzip ketemin. 25 kelilik ziltemirdi kóteremin. 10-15 kelini múlde sezbeımin. Jańa kelgenderge ol ońaı emes qoı. Kórgender tańyrqap: «Apa, siz neshe jastasyz?» dep suraıdy. Qazir menen jasy kishi áıelder de kóbeıip jatyr. Oǵan qosa, orys halqy óz densaýlyǵyna jaqsy qaraıdy, al qazaqtardy zaldan sırek kezdestiresiń, — deıdi qarııa.

Káýııa apa óziniń kún tártibin tizip berdi.

— Tańerteń erte turamyn da, saǵat 11-ge deıin sport zalyna baryp kelemin. Tańerteń jyly sýǵa bir qasyq bal qosyp ishemin. Eger 1-2 kún jattyǵý jasamaı qalsam, denem kádimgideı aýyrlap, sportty izdeımin. Qazir 4 shóberem, 7 nemerem bar. Nemerelerimniń sabaǵyn qadaǵalaımyn, biraq ózime de ýaqyt tabamyn. Úıde jata berseń, kóringen nárseni kóńilińe ala beresiń, — deıdi stýdııa qonaǵy.

Salaýatty ómir saltyn ózine serik etken áje ómirlik ustanymdaryn da aıtyp berdi.

— Adam óz-ózine qaraýy kerek. Densaýlyq oınaıtyn dúnıe emes. Sportpen shuǵyldanbaı jata berseń, aýyryp, tez qartaıasyń. Al sportpen aınalyssań, kóńiliń ashylady, qýatyń artady, densaýlyǵyń jaqsarady. 60-tan asyp, zeınetke shyqqan soń, densaýlyqqa erekshe qaraý qajet, — deıdi ol.

Aıta keteıik, «Aq bıdaı» aýyl sporty oıyndarynda BQO quramasy alǵash ret úzdik úshtikke ilikti.