Kúnine Soltústik Aralǵa qansha sý baǵyttalyp jatyr – mınıstr jaýaby

TAShKENT. KAZINFORM – Qazirgi ýaqytta Shardarada 2,7 mlrd tekshe metr sý bar. Bul týraly Tashkentke jumys saparymen kelip, Kazinform tilshisiniń saýalyna jaýap bergen QR Sý resýrstary jáne ırrıgatsııa mınıstri Nurjan Nurjigitov málim etti.

- Búgingi kúni Shardarada 2 mlrd 700 mln tekshe metr sý bar. Syrdarııa boıynsha oǵan sekýndyna 150-200 tekshe metr sý kelýde. Onyń ishinde sekýndyna 15 tekshe metr sý Soltústik Aralǵa baǵyttalyp jatyr. Josparǵa sáıkes, vegetatsııa kezeńinde oǵan 997 mln tekshe metr sý jiberýimiz kerek. Jumystar kestege saı oryndalýda, - dedi Nurjan Nurjigitov Kazinform tilshisiniń saýalyna jaýap bere otyryp.

Mınıstr Shardaradan Ózbekstandaǵy Aıdar-Arnasaı kólder júıesine sý jiberý jumysy da kelisim sheńberinde iske asyp jatqanyn aıtty.

- Sýdyń kólemin belgileý jeltoqsan aıynda júrgiziledi. Sol kezde bizge Ózbekstannan suranys túsedi. Byltyr jeltoqsanda kezdesip, kólemdi bekittik. Tıisinshe, bıyl qańtardan bastap Arnasaıǵa 1 mlrd 800 mln tekshe metr sý jiberdik. Al kelesi jylyǵy kelisim týraly áli áńgime qozǵalǵan joq. Óıtkeni, oǵan áli erte, - dep toqtaldy Nurjan Nurjigitov.

Eske salaıyq, qazirgi tańda Qazaqstan men Ózbekstan arasynda sý bólý kelisiminiń jańa jobasyn ázirleý boıynsha kelissóz júrip jatyr.

Buǵan deıin habarlaǵanymyzdaı, bıyl Syrdarııa ózeni arqyly Shardara sý qoımasyna 16 mlrd tekshe metr sý túsýi tıis.

Munymen birge Qazaqstan men Ózbekstan Syrdarııa ózeniniń boıyna sý esepteıtin qurylǵylar ornatýǵa nıetti ekenin jazyp edik. Mınıstr Nurjan Nurjigitov atap ótkendeı, bul jumys bıyl aıaqtalýy qajet.