Otandyq ónim: Óskemendik azamattyń óz úıinde jasaǵan sabynyna suranys artyp keledi
ÓSKEMEN. KAZINFORM – Óskemen qalasynyń irgesindegi Shyǵys aýylynda turatyn Jiger Boranbaı kir sabyn jasap, sony saýdalap paıda taýyp júr. Alyp-satarlyqpen aınalyspaı ózi taýar shyǵaratyn azamat aldaǵy ýaqytta kásibin keńeıtýdi kózdeıdi. Kazinform tilshisi ony áńgimege tartyp, sabyndy qalaı jasaıtynyn surap kórdi.
— Áńgimemizdi týyp-ósken jerińizden bastasaq?
— Qytaı Halyq Respýblıkasynyń Qaba aýdanynda týdym. Atajurtqa ótken jyldyń tamyz aıynda áıelim, ulym, kelinim men nemerelerim kóship keldik. Sol ýaqyttan beri Óskemendegi Shyǵys aýylynda turyp jatyrmyz.
— Sabyn jasaý ıdeıasy qalaı keldi?
— Bul ıdeıany jergilikti azamat Serikbek Raıhannyń keńesimen iske asyrdym. 2 mln teńgege Almatydan stanok aldyrdym. Onyń ózi birneshe saımannan, aýyr temirden turady. Alǵashynda qıyndaý boldy. Sabyn úgitilip, oıdaǵydaı shyqpady. Sonda da taýymdy shaqpaı, saǵymdy syndyrmaı isteı berdim. Ýaqyt óte kele úırenip kettik.
— Kúnine qansha sabyn jasaısyz?
— Barlyǵy úsh adam — ulym Eshat Jiger men kúıeýbalam Aıdyn Qasılanmen birge jumys isteımiz. Kúnine 1000 sabyn shyǵady. Shaǵyn konteıner satyp alyp, úı aýlasyna ornatqanmyn. Sonyń ishinde jasaımyz. Іshin jyly etip qaptap, toq pesh qoıdym. Bastysy, sý ótpeıdi. Jumysty tańerteń bastaımyz. Kir sabyn — toń maı, suıyq maı jáne kaýstık sodasynan daıyndalady. Toń maıdy qaınatyp, stanokqa quıamyz. Barlyǵy naqty gradýspen ólshenedi. Kir sabyn qalpyna túsip, stanok ekpin alǵanda úsh jaqtap jınap alamyz.
— Sabyndy qansha teńgeden satasyz?
— Bir sabynnyń baǵasy — 110 teńge. Eger kún saıyn myń sabyn shyǵyp, oıdaǵydaı satylyp jatsa 110 myń teńge túsedi. Onyń 50 myńy shyǵyn. Sonda qalǵan 60 myńy taza tabys.
— Sabynnyń sapaly ekenin qalaı bilýge bolady?
— Kir sabyndardyń túsinde ózgeshelik bolady. Soǵan qarap, sapasyn anyqtaıdy. Neǵurlym qoıý qońyr tústisi kıim, kilem jýǵanda molynan kópirshıdi, kirdi tez ketiredi. Dári kóp qosylyp ketse, ashyq tús beredi.
— Saýdańyz qalaı júrip jatyr?
— Suranys keıde kúrt kóbeıedi, keıde azaıyp qalady. Birneshe aı buryn Qaraǵandyǵa sabyn jónelttik. Endi jazda qaladaǵy bazarlarǵa aparyp, turaqty klıentter tabýdy kózdep otyrmyz. Qalaǵandar úıden satyp alyp kete alady. Aı saıyn alatyndar az da bolsyn kóbeıip kele jatyr.
— Aldaǵy josparlaryńyz qandaı?
— Keleshekte sertıfıkat rásimdep, ózindik brend qalyptastyrǵym keledi. Ataýy ázirge belgisiz. Biraq jer-sýmen baılanystyryp qoıamyn ba dep otyrmyn. Munyń aldynda «Jupar» degen marka tańdaǵymyz kelgen. Biraq bireýdikin alyp qoıa salsaq, erteń ózimizge syn, ári avtorlyq quqyqty buzǵan bolyp shyǵamyz. Áıtpese, ádemi estiledi. Kórermiz, bálkim ıiske qatysty ataýdy da tańdaýymyz múmkin.
— Áńgimeńizge kóp rahmet!
