Kúnine eki áıel jatyr moıny obyrynan kóz jumady

ASTANA. KAZINFORM – Qazaqstanda jyl saıyn 600-den astam áıel jatyr moıny obyrynan qaıtys bolady, ıaǵnı orta eseppen táýligine – eki áıel. Bul týraly Astana qalasynyń Kommýnıkatsııalar qyzmetinde ótken brıfıngide akýsher-gınekolog, professor Janerke Ajetova málimdedi.

2025 jylǵy derek boıynsha, elordada reprodýktıvti jastaǵy myńnan astam áıel jatyr moıny obyry dıagnozymen esepte tur, al jyl saıyn 120-dan astam jańa jaǵdaı tirkeledi. Jatyr moıny obyry áıelder arasyndaǵy qaterli isikterdiń ishinde sút bezi obyrynan keıingi ekinshi orynda tur. 

– Adam papılloma vırýsyn (APV) juqtyrǵandardyń basym bóligi ózinde ınfektsııa baryn bilmeıdi. Bul obyrǵa deıingi ózgeristerdi kesh anyqtaýǵa jáne aýrýdyń asqynýyna ákeledi, - dedi Janerke Ajetova.

Mamannyń aıtýynsha, APV tek jynystyq jolmen ǵana emes, turmystyq-qatynastyq jáne anadan balaǵa da juǵýy múmkin. Vırýstyń uzaq ýaqyt belgisiz ótýi áıelderdiń óz densaýlyǵyna nemquraıdy qaraýyna sebep bolyp, qaterli isikke shaldyqý yqtımaldyǵyn arttyrady.

Eske salaıyq, buǵan deıin elimizde bir jylda 43 myńnan astam adamnan qaterli isik anyqtalǵanyn habarlaǵan edik. Qazir el boıynsha qaterli isikpen ómir súrip jatqan adamdar sany 246 myńnan asty. Bul aldyńǵy jylmen salystyrǵanda 6,6%-ǵa kóp.