Kúnine bir ǵana chek: Qarjy mınıstri salyqtan jaltarǵan kásipkerler týraly
ASTANA. KAZINFORM – 2024 jyly kóleńkeli ekonomıkanyń deńgeıi 0,9 paıyzdyq tarmaqqa tómendep, 16,7% boldy. Ásirese ishki saýda, aýyl sharýashylyǵy salalarynda tómendeý baıqaldy. Úkimette Qarjy mınıstri Mádı Tákıev kóleńkeli ekonomıkany tómendetý sharalary týraly aıtyp berdi.
Onyń aıtýynsha, bıyl qańtar aıynda mınıstrlikke kóleńkeli ekonomıkaǵa qarsy úılestirý men jalpy saıasaty berildi. Oǵan qosa, salyqtyq ákimshilendirýde zamanaýı tsıfrlyq quraldar engizilip jatyr.
Bul baǵyttaǵy negizgi jobalardyń biri – jasandy ıntellekt quraldaryn paıdalanatyn Smart Data Finance júıesi. Munda azamattar men bıznestiń derekter aýqymy taldanady, salyq tóleýden jaltarý shemalary anyqtalyp, salyq tóleýshiniń tsıfrlyq profıli qalyptasady. Búgingi kúni bul júıege 74 derekkóz qosylǵan, jyl sońyna deıin taǵy 30 ıntegratsııa qosý josparlanyp otyr.
– Qazir shaǵyn jáne orta bıznes sektorynda salyqtardy barynsha azaıtý jáne tóleýden jaltarý shemalary áli de ózekti bolyp otyr. Mysaly, bir zańdy mekenjaı boıynsha birneshe kompanııa tirkelgen. Aqparattarǵa sáıkes, tek 3 576 mekenjaıdyń ózinde 20 myńǵa jýyq kompanııa tirkelgen, al olardyń salyq boıynsha bereshegi 60,4 mlrd teńge. Olardyń is júzindegi qyzmetin anyqtaý úshin, salyqtyq tekserý júrip jatyr, – dedi M.Tákıev Úkimet otyrysynda.
Sondaı-aq, bıýdjettiń túsimine jatatyn salyqtar somasynyń tómendeýine tikeleı áser etetin, jekelegen kásipkerlerdiń kassalyq tártipti saqtamaýy da kezdesip otyr.
– Kásipkerlerden fıskaldyq chek talap etý boıynsha azamattardyń mádenıetin kóterý kerek, bul birinshi kezekte olardyń tutynýshylyq quqyqtaryn qorǵaý bolyp sanalady. 2024 jyly 402 myńǵa jýyq baqylaý-kassalyq mashınasy nemese tirkelgenderdiń 39%-y chek bermegeni anyqtaldy. Sonymen qatar 16 755 baqylaý-kassalyq mashına POS-termınaldar men QR-tólemder boıynsha túsimder bolǵanymen chek berilmegen. Bir aı boıy kúnine tek bir ǵana chek shyǵaryp kelgen nemese túsimniń birdeı somasyn kórsetip kelgen 260 myńǵa jýyq salyq tóleýshi anyqtaldy, – dedi Qarjy mınıstri.
Tıisti jumystardyń nátıjesinde 400 myń kassanyń ishinen bıyl 70 myń kásipker chek bere bastady. Osylaısha, joǵaryda kórsetilgen tsıfrlyq sheshimderdi engizý, atalǵan faktilerdi jedel anyqtaýǵa jáne jolyn kesýge múmkindik beredi.
Aıta keteıik, elde azamattar men sheteldikterdiń kóleńkeli kirisin anyqtaýdyń jańa júıesi engiziledi.