Qazaqstannyń AQSh-taǵy elshiligi úndeý jasady
ASTANA. KAZINFORM – Vashıngtondaǵy Qazaqstan elshiligi deportatsııa týraly sheshim shyqqan AQSh-taǵy otandastardy aıyppuldar men basqa da sanktsııalardan saqtaný úshin otanǵa erikti túrde qaıtý múmkindigin paıdalanýǵa shaqyrdy.
— AQSh bıligi deportatsııalaý týraly sot sheshimin alsa da, elge qaıtpaı júrgen sheteldik azamattarǵa «CBP Home» mobıldi qosymshasyn paıdalaný arqyly múmkindiginshe qysqa merzimde óz erkimen elderine oralýǵa shaqyrýda ekenine nazar aýdaramyz, — delingen elshilik habarlamasynda.
«CBP Home» mobıldi qosymshasy arqyly óz eline qaıtatyn azamattarǵa kelesi múmkindikter berilmek:
— Azamattyń ózi qalaǵan reıspen erikti jáne qaýipsiz túrde elge oralý múmkindigi bar;
— AQSh-ta jumys jasap, tapqan qarajaty azamattyń ózinde qalady;
— Quzyrly organdar tarapynan qamaýǵa alynbaıdy jáne májbúrli deportatsııasyz óz eline oralady;
— Áýe bıletin satyp alýǵa múmkindigi joq azamattarǵa qarjylaı sýbsıdııa alý múmkindigi beriledi;
— Bolashaqta zańdy túrde AQSh-qa qaıta kelý quqyǵyna ıe bolady.
⠀
Óz erkimen elderine qaıtpaǵan jaǵdaıda tómendegi sharalardy qoldaný josparlanyp otyr:
— Jedel túrde deportatsııalaý. AQSh Іshki qaýipsizdik mınıstrliginiń (DHS) qyzmetkerleri eshbir daıyndyqsyz, azamattardy jedel túrde qamaýǵa alady;
— Aıyppuldar men sanktsııalar. Eger azamat deportatsııa sheshimi bola turyp, eline qaıtpaǵan bolsa oǵan táýligine 998 AQSh dollar aıyppul salynady. Bul rette aıyppul salý retrospektıvti túrde, ıaǵnı bes jyl buryn elden ketý týraly sot sheshimi shyqqan azamattardan óndiriledi (bul jaǵdaıda aıyppul shamamen 1 mıllıon dollarǵa deıin barýy múmkin). Aıyppuldy tóleý múmkindigi bolmaǵan jaǵdaıda zańsyz júrgen sheteldikterge tıesili jyljymaıtyn jáne basqa da múlikterin memleket menshigine alý tásili qarastyrylady.
— Sonymen qatar, «CBP Home» arqyly qaıtatynyn bildirip, eline oralmaǵan azamatqa 1000-5000 dollar kóleminde qosymsha aıyppul salynady;
— AQSh-qa qaıta kelýge tyıym salynady. AQSh aýmaǵyna zańdy túrde qaıta kirý quqyǵynan kóshi-qon júıesi arqyly bas tartý.
— Osyǵan oraı, elshilik jaǵymsyz jaǵdaılardyń aldyn alý maqsatynda qazaqstandyq azamattardy AQSh bıligi usynylǵan múmkindikti paıdalanýǵa shaqyrady, — delingen habarlamada.
Aıta ketelik AQSh-ta bir aı ishinde myńnan astam sheteldik stýdenttiń vızasy joıylǵany týraly jazǵan edik.