Kúnine 5 kesege deıin kofe ishý paıdaly bolýy múmkin
ASTANA. KAZINFORM — Ǵalymdar bul densaýlyǵy myqty eresekterge qatysty boljam ekenin aıtady. Júrek aýrýlary, qant dıabeti jáne pestıtsıdterdiń áseri boıynsha júrgizilgen zertteýler osyny kórsetedi, dep habarlaıdy DW.
Shamamen 150 jyldan beri kofeniń adam aǵzasyna áseri úlken pikirtalas týdyryp keledi. Osy ýaqyt ishinde bul sýsynǵa degen kózqaras birneshe ret ózgergen.
Amerıkalyq júrek qaýymdastyǵynyń (AHA) sońǵy málimetterine sáıkes, kofeındi qalypty mólsherde tutyný, ıaǵnı kúnine 400 mıllıgramǵa deıin kofe ishý deni saý eresekterdiń kópshiligi úshin qaýipsiz ǵana emes, júrek-qan tamyrlary aýrýlarynyń aldyn alýy múmkin. Qaýymdastyqtyń esebinshe, bul shamamen kólemi 240 mıllılıtr bolatyn 3-5 kese qara kofege teń.
Eýropalyq azyq-túlik qaýipsizdigi basqarmasy (EFSA) da deni saý eresekter úshin táýligine 400 mıllıgramǵa deıin kofeın tutynýdy qaýipsiz dep sanaıdy. EFSA baǵalaýynsha, 200 mıllılıtr súzilgen kofede shamamen 90 mıllıgramm kofeın, al 60 mıllılıtr espressoda shamamen 80 mıllıgramm kofeın bolady. Al júkti áıelderge táýligine 200 mıllıgramnan aspaý usynylady.
Belgili bir syrqaty bar jáne dári-dármek qabyldap júrgen adamdar úshin kofe mólsheri jeke eseptelýi múmkin. Kofe ishkennen keıin júrek soǵysy men qan qysymynyń ýaqytsha joǵarylaýy, sondaı-aq júrek qaǵýy nemese mazasyzdyq sezimi keı adamdarda qysqa merzimdi belgiler retinde baıqalady. Maınts ýnıversıtetindegi kardıologııa ortalyǵynyń mamany Omar Hahadtyń pikirinshe, aǵza kofeni turaqty tutynýǵa birtindep beıimdeledi.
— Kóptegen zertteýler kofeni únemi ishetin adamdarda ony óte sırek ishetin nemese múlde ishpeıtinderge qaraǵanda 2-tıpti qant dıabetiniń damý qaýpi tómen ekenin kórsetti, — deıdi Germanııanyń taǵamtaný ınstıtýtynyń mamany Mattıas Shýltse.
Bul baılanys kofeınsiz kofeni tutynǵan adamdarda da baıqalǵan. Kofeden múlde bas tartýmen salystyrǵanda, kúnine 6 kese kofe ishý qant dıabetiniń damý qaýpin statıstıkalyq turǵydan shamamen 33 paıyzǵa tómendetken.
— Bul áser kofeınniń ózinen emes, kofeniń quramyndaǵy basqa komponentterden bolýy múmkin, — dep boljaıdy Shýltse.
Alaıda ǵalymdar zertteý nátıjelerin «kofe ishýge arnalǵan retsept» retinde qabyldamaýǵa shaqyrady. Sebebi uzaq ári salaýatty ómir súrýge kepil bolatyn, barlyǵyna birdeı jaramdy ǵylymı negizdelgen ámbebap usynystar joq.
Buǵan deıin AQSh ǵalymdary kofeniń qartaıýdy baıaýlatýǵa yqtımal paıdasyn túsindirdi.
