Kúnine 10 000 emes, 7000 qadam: densaýlyqqa paıdasy dáleldendi

ASTANA. KAZINFORM — Kúnine 7000 qadam júretin adamdarda mezgilinen buryn ómirmen qoshtasý qaýpi kúnine 2000 qadam ǵana jasaıtyndarǵa qaraǵanda eki ese tómen, dep jazady DW saıty Lancet Public Health ǵylymı jýrnalyna silteme jasap. 

Ǵalymdardyń aıtýynsha, kúnine shamamen 1 saǵattyq júriske teń 7000 qadam mıdyń dementsııasy damý qaýpin 38%-ǵa, depressııany — 22%-ǵa, al qant dıabetin — 14%-ǵa azaıtady. Serýendeýdi unatatyn adamdarda qaterli isikke shaldyǵý yqtımaldyǵy da tómendeıdi.

Halyqaralyq ǵalymdar toby 160 000 adamdy qamtyǵan 57 zertteýdi taldap, kúnine 10 myń qadam júrý usynysynyń ǵylymı negizi joq ekenin dáleldedi. Bul san alǵash ret 1964 jyly Tokıoda ótken Olımpıada qarsańynda Yamasa Tokei kompanııasy jarnamalaǵan japondyq qadam ólshegishpen (shagomer) tanymal boldy. Qurylǵy Manpo-Kei dep ataldy, bul japon tilinen tikeleı aýdarǵanda «10 000 qadam eseptegishi» degen maǵynany bildiredi.

— Densaýlyqqa paıdaly bolý úshin kúnine mindetti túrde 10 000 qadam júrýdiń qajeti joq, — deıdi zertteýdiń avtorlarynyń biri, Kembrıdj ýnıversıtetiniń ǵalymy Peddı Dempsı. 

Peddı Dempsı paıymynsha, eń úlken paıda 7000 qadam kezinde baıqalady, sodan keıin bul áser aıtarlyqtaı ózgermeıdi. 

Onyń aıtýynsha, eger siz qazirdiń ózinde 10 000 qadam júrseńiz — jaqsy, jalǵastyra berińiz. Al eger kúnine 2000–3000 qadam ǵana jasaıtyn bolsańyz, birtindep taǵy 1000 qadam qosýǵa tyrysyńyz.

«Kúnine 10 myń qadam bul tek marketıngtik qýlyq, al 7 myń qadam shyn máninde mańyzdy» deıdi ǵalymdar.

Jalpy júgirý men jıi jaıaý júrýdiń paıdasyn bilgińiz kelse, myna siltemege ótińiz.