Kúnine 4 saǵat qana uıyqtap, eńbek etetinbiz - zeınetker áje ómir joly jaıly
AQTÓBE. QazAqparat - Aqtóbelik Álııa Kenjalına Qarttar kúni quttyqtap barǵan depýtattarǵa ómir jolyn aıtyp, jastardyń erinbeı eńbek etýge shaqyrdy, dep habarlaıdy QazAqparat tilshisi.
Nur Otan partııasy Aqtóbe oblystyq fılıaly tóraǵasynyń birinshi orynbasary Erbol Danaǵulov pen oblystyq máslıhattaǵy fraktsııa músheleri elimizdiń órkendeýine úles qosqan aǵa býyndy Halyqaralyq qarttar kúnimen quttyqtady. Olardyń kóbi malshy, ustaz, kolhozda eńbek etken qarapaıym eńbek adamy. Qurmetke bólengen Álııa Kenjalına qazir 85 jasta. Ol 12 jyl boıy joldasy Serikbaı Jumabaevpen birge Shalqar aýdany, Bershúgir sovhozynda qoı baqqan. Keıin joldasy fermanyń zootehnıgi, al ózi dúkenshi bolyp qyzmet istedi. Qazir Álııa Kenjalına 9 bala tárbıelep, odan 34 nemere, 26 shóbere súıip otyr. Joldasy osydan 5 jyl buryn dúnıeden ótipti.
«Eńbekpen el kógerer» degen. Jastaıymnan eńbekke aralastym. Túzde shóp tasyp, mal baqtym. Er azamattyń jumysyn istesedim. 15 jasymda ákem eski tigin mashınasyn alyp bergen, sonymen úıde is tiktim. Kúnine 4 saǵat qana uıyqtadyq. Qazirgi jastar bizdeı eńbek etse, elimizdiń jaǵdaıy áldeqaıda jaqsy bolar edi», - deıdi batyr ana Álııa Kenjalına.
Nurotandyqtar quttyqtap barǵan ardagerlerdiń biri — Ajar Orazǵalıeva. Ol el basyna kún týǵan shaqta ózi suranyp soǵysqa attanǵan. Ol kezde nebári 18 jasta bolatyn. Qarshadaı qyz qarý asynǵan qurbylarymen birge basqynshylardyń talaı shabýylyna tosqaýyl jasady. Zenıtpen atqylap, fashısterdiń ushaqtaryn qulatqan ýaqyttary da máńgi jadynda. Ardager Kýrsk, Orel, Belgorod, Harkov, Kıevti jáne Rýmynııa, Vengrııany azat etýge qatysyp, Jeńisti Berlınde qarsy alǵan eken.
«Úlkendi qurmettep, syılaı bilgen elmiz. Kónekóz qarııalarymyzdyń ómirlik tájirıbesi men aqyl-keńesi, tálim-taǵylymy bólek. Árqaısysy ǵumyrynyń eń qyzyqty da jarqyraǵan jastyq shaǵyn elimizdiń órkendeýine, keler urpaqtyń ıgiligine arnady. Urpaqqa bergen ulaǵatty tálim-taǵylymdary men qoǵam ómirine qosqan úlesi úshin aǵa urpaqqa rızashylyǵymyz sheksiz», - deıdi Erbol Danaǵulov.
