Quny túsip ketti - KASE «Qazaqtelekom» aktsııalarynyń saýdasyn toqtatty
ASTANA. KAZINFORM – Búgin Qazaqstan qor bırjasy (KASE) «Qazaqtelekom» AQ qarapaıym aktsııalarynyń saýdasyn toqtatqanyn habarlady. Buǵan onyń quny 31,51%-ǵa tómendep ketýi sebep bolǵan, dep jazady Kazinform agenttiginiń tilshisi.
— 2025 jylǵy 21 mamyrda jasalǵan sońǵy KZTK mámilesinde bir aktsııa baǵasy 58 400,00 teńge boldy. Al 2025 jylǵy 22 mamyrda bir aktsııanyń quny 39 999,99 teńgege túsip ketti, sodan keıin KZTK aktsııasynyń saýdasy toqtatyldy, — delingen KASE habarlamasynda.
Ulttyq kompanııa aktsııalary KASE-niń resmı tiziminde «Premıým» sanatynda usynylǵan bolatyn. Alaıda, bırjalyq qyzmetti júzege asyrýdyń ishki erejelerine sáıkes, eger aktsııa baǵasy 30%-ǵa jáne odan kóp tómendese, saýda avtomatty túrde toqtatylady.
Aıta keteıik, buǵan deıin Qor naryǵyna shyǵarylǵan Air Astana aktsııalary áýelgi baǵasynan 30 paıyzǵa jýyq arzandaǵany jaıly jazǵan edik.