Kúni boıy kólikte júretinder durys tamaqtanýy qajet - mamandar
ASTANA. QazAqparat - Kóptegen adam qazir kólikten túspeıdi. Kúnine birneshe saǵat boıy rýlden ajyramaıtyndardyń kóbine asqazany aýyryp, túrli syrqattar «jabystyryp» alady. «Aýrý astan...» degendeı, munyń kóbi durys tamaqtanbaǵannan bolady.
Kúni boıy kólikte júretin jandar, buıyrǵan tamaqty jeýge májbúr. Mundaıda, fastfýd ónimderi tez tabyla ketedi. Al, árbir júrgizýshiniń kóliginen gazdalǵan sýsynnyń ydysy tabylatyny qupııa emes. Bul bilinbeı kelip bizdiń densaýlyǵymyzdy qurtyp jatqany mamandardy qatty alańdatyp otyr.
Dıetologtar, buǵan beıjaı qaramaı, durys tamaqtanýdy dereý qolǵa alý qajettigin aıtady. Ásirese, úıden tańǵy asty iship shyǵý qajet. Al jolǵa 1,5 lıtr gazdalmaǵan sý alyp shyǵý kerek.
Eger tańǵy as ishýge úlgermeseńiz, onda bir bótelke ıogýrt pen azǵantaı jemis jıdek jáne bólke alyp shyǵyńyz. Kólikte tuzdalmaǵan kreker nemese nan bólikterin alyp shyǵýǵa bolady. Al sý mindetti túrde, ásirese jazda, sizdiń qasyńyzda bolýy tıis. Óıtkeni, shól basty aýyrtyp qana qoımaı, qyraǵylyqty tómendetedi.
Eger kólikpen uzaq saparǵa shyǵar bolsańyz, ózińizben birge alyp shyǵatyn taǵamdardyń tizimin jasańyz. Sondaı-aq, qajetti dári-dármekti, ásirese, ishtiń ótýin toqtatatyn dárini umytpańyz.
Taǵamdardyń buzylyp ketýine jol bermeıtin tońazytqysh-sómke satyp alańyz.
Dárigerler jolda tuzdy taǵamdar jeýge keńes bermeıdi. Mysaly, chıps, tuzdy jańǵaq jáne t.b tuzdy ónimderden bas tartyńyz.
Jolda arnaıy ýaqyt bólip, dene jattyǵýlaryn jasap turǵan jón.
