Quny 79 mln teńge: memleket esebinen jasalatyn eń qymbat otalar
ASTANA. KAZINFORM – Quny 79 mln teńgege deıingi eń qymbat operatsııalar búginde barlyq qazaqstandyqqa qoljetimdi. Bul týraly DSM baspasóz qyzmeti habarlady.
Qazaqstanda joǵary tehnologııalyq medıtsınalyq kómek (JTMK) barǵan saıyn qoljetimdi jáne nátıjeli bolyp otyr, bul memlekettik qarjylandyrý tetikteri esebinen eń kúrdeli jáne qymbat aralasýlardy júrgizýge múmkindik beredi.
Eń qymbat joǵary tehnologııalyq operatsııa kómekshi júrek júıesin ımplantattaý boldy — onyń quny 79 mln teńge.
2025 jyldyń 11 aıynda mundaı júıeler 59 patsıentke ornatyldy, olardyń kópshiligi úshin operatsııa ómir súrýdiń jalǵyz múmkindigi boldy.
Quny boıynsha ekinshi orynda — allogendi gemopoetıkalyq diń jasýshalaryn transplantattaý: bir jaǵdaıda 17,4 mln teńge, barlyǵy 117 operatsııa oryndaldy.
Sonymen qatar, joǵary tehnologııalyq aralasýlar eń tanymal boldy:
Avtomatty kardıoverter-defıbrıllıatordy ımplantattaý — 1 963 jaǵdaı;
bas jáne moıyn tamyrlarynyń endovaskýlıarlyq embolızatsııasy jáne okklıýzııasy -1 463 jaǵdaı;
uryqtyń diń jasýshalaryn transplantattaý -1 384 jaǵdaı.
Joǵary tehnologııalyq medıtsınalyq kómek mamandandyrylǵan medıtsınalyq kómektiń bóligi jáne dıagnostıka men terapııanyń ınnovatsııalyq, ǵylymı negizdelgen jáne qaýipsiz ádisterin qoldana otyryp, kúrdeli aýrýlardy emdeýde qoldanylady.
— Búgingi tańda elde 82 joǵary tehnologııalyq medıtsınalyq tehnologııalar bar. JJBI terapııa, pedıatrııa, neırohırýrgııa, onkologııa, kardıohırýrgııa, travmatologııa, ýrologııa, akýsherlik jáne gınekologııa, sondaı-aq transplantologııa sııaqty negizgi klınıkalyq baǵyttar boıynsha kórsetiledi.
Respýblıka boıynsha 120-dan astam medıtsınalyq uıym halyqqa joǵary tehnologııalyq medıtsınalyq kómek kórsetti.
Tegin medıtsınalyq kómektiń kepildik berilgen kólemi sheńberinde 1,6 myńnan astam patsıentke operatsııa jasaldy, mindetti áleýmettik medıtsınalyq saqtandyrý júıesi boıynsha — 17,5 myńǵa jýyq.
Ótelgen shyǵyndardyń jalpy kólemi 79 mlrd teńgeni, bir jaǵdaıdyń ortasha quny 4,1 mln teńge boldy, — delingen DSM habarlamasynda.
Joǵary tehnologııalyq medıtsınalyq kómekti damytý jáne keńeıtý densaýlyq saqtaý júıesiniń negizgi baǵyttarynyń biri bolyp qala beredi, bul ómirdi saqtap qalýǵa, múgedektikti azaıtýǵa jáne patsıentterdi eń aýyr dıagnozdarmen de tolyqqandy ómirge qaıtarýǵa múmkindik beredi.
Aıta ketelik elimizde ólim-jitim azaıyp, ómir súrý uzaqtyǵy artqany týraly jazǵan edik.