Quny 54 mln bolatyn 247 myń lıtr munaı ónimderiniń kóleńkeli aınalymy toqtatyldy

ASTANA. KAZINFORM – Almaty qalasy men Abaı oblysynda jalpy somasy 54 mıllıon teńgeden asatyn 247 myń lıtrden astam munaı ónimderiniń kóleńkeli aınalymy toqtatyldy. Bul týraly Qarjy mınıstrliginiń Memlekettik kirister komıteti málim etti. 

Komıtet Almaty qalasy men Abaı oblysynda janar-jaǵarmaıdyń zańsyz aınalymynyń iri faktisin anyqtap, jolyn kesti. 

— 30 sáýirde Almaty qalasyndaǵy munaı bazalarynyń birinde tekserý is-sharalary barysynda 35 mıllıon teńgeden astam somada 177 100 lıtr janar-jaǵarmaı anyqtaldy. Ónimder rezervýarlarda, benzın tasymaldaý kólikterinde jáne plastık ydystarda tıisti qujattarsyz saqtalǵan. Materıaldar protsestik sheshim qabyldaý úshin Almaty qalasynyń Ekonomıkalyq tergeý departamentine joldandy, — delingen habarlamada.

Al, 25 sáýirde Semeı qalasynda (Abaı oblysy) júrgizilgen jospardan tys salyqtyq tekserý nátıjesinde salyq esebine alynbaǵan, qyzmetti zańsyz júzege asyrǵan, tirkelmegen avtojanarmaı quıý stantsııasy anyqtaldy. Quny shamamen 19 mıllıon teńge 70 tonnadan astam munaı ónimderi alyndy. Materıaldar Abaı oblysynyń Ekonomıkalyq tergeý departamentine joldandy.

— Aktsızdeletin taýarlardyń zańsyz saýdasy ekonomıkaǵa zııan keltirip, adal kásipkerler úshin teńsiz jaǵdaı týǵyzady jáne qorshaǵan orta men halyq qaýipsizdigine qaýip tóndirýi múmkin, — dep habarlady Memlekettik kirister komıtetinen.

Eske sala keteıik, buǵan deıin Aqmola oblysynda zań buzǵan avto-gaz quıý stantsııalaryna 1 mln teńge aıyppul salynǵanyn jazǵan bolatynbyz.