Quny – 443 mln teńge: Ulytaý oblysynda 31 jer ýchaskesi memleketke qaıtaryldy
ASTANA. KAZINFORM - Jer resýrstaryn utymdy paıdalaný memlekettik saıasattyń basym baǵyttarynyń biri bolyp sanalady. Osyǵan baılanysty prokýratýra organdary jer qatynastary salasyndaǵy zańdylyqtyń saqtalýyna turaqty negizde qadaǵalaý júrgizedi.
Júrgizilgen jumys barysynda jer ýchaskelerin berý jáne paıdalaný kezinde zańnama talaptarynyń buzylǵany anyqtaldy. Atap aıtqanda, Jańaarqa aýdanynda quny 334 mln teńge bolatyn, aýdany 169 ga aýyl sharýashylyǵy maqsatyndaǵy jer ýchaskesin zańsyz berý faktisi anyqtaldy.
Jezqazǵan qalasynda ýaqytsha jer paıdalaný quqyǵynyń merzimi aıaqtalǵannan keıin memleket menshigine qaıtarylmaǵan, jalpy aýdany 2,9 ga bolatyn quny 96 mln teńge 29 jer ýchaskesi anyqtaldy.
Sonymen qatar quny 11 mln teńge bolatyn kommertsııalyq maqsattaǵy jer ýchaskesin zańsyz berý faktisi anyqtaldy.
Prokýrorlyq qadaǵalaý aktilerin qaraý nátıjesinde jalpy quny 443 mln teńge bolatyn 31 jer ýchaskesi memleket menshigine qaıtaryldy.
Jer zańnamasynyń saqtalýyn qamtamasyz etý jáne jer qatynastary salasyndaǵy memleket múddesin qorǵaý jumystary jalǵasyp jatyr.
Aıta keteıik, Qyzylordada 53 jer ýchaskesi men 6 sý aıdyny memleketke qaıtaryldy.
Túrkistan oblysynda 10 sý kanaly memleket menshigine qaıtaryldy.
Pavlodar oblysynda memleket menshigine 2 myń gektardan astam jer qaıtaryldy.
