«Quny – 40 mln»: Aqmola oblysynda aýyl sharýashylyǵy tehnıkasy bólshekterin urlaǵandar ustaldy
ASTANA. KAZINFORM – Aqmola oblysynda 40 mıllıon teńge turatyn aýyl sharýashylyǵy tehnıkasy bólshekterin urlaǵandar ustaldy. Bul týraly ІІM baspasóz qyzmeti habarlady.
Aqmola oblysynda polıtseıler jalpy somasy 39 mıllıon 627 myń teńgege baǵalanatyn aýyl sharýashylyǵy tehnıkasynyń qosalqy bólshekterin urlaý deregin áshkereledi. Qylmys bıylǵy sáýir aıynda Egindikól aýdanynda tirkelgen.
Júrgizilgen jedel-izdestirý is-sharalary barysynda polıtsııa qyzmetkerleri kombaındarǵa tıesili bólshekterdi urlady degen kúdikpen úsh azamatty ustady. Tergeý barysynda bólshekterdiń 2024 jyldyń qarashasynan 2025 jyldyń sáýir aıyna deıingi aralyqta jergilikti jaýapkershiligi shekteýli seriktestiktiń aýmaǵynan júıeli túrde urlanǵany anyqtaldy.
Krımınaldyq polıtsııa qyzmetkerleri arnaıy jasaqtyń qoldaýymen Egindikól aýdanynda 35, 30 jáne 25 jastaǵy úsh kúdiktini quryqtady.
Aldyn ala málimet boıynsha, 30 jastaǵy aqmolalyq kúdikti qys mezgilinde shananyń kómegimen seriktestik aýmaǵynan qosalqy bólshekterdi shyǵaryp, keıinnen eki sybaılasymen birigip, Atbasar aýdanyndaǵy satyp alýshyǵa ótkizgen.
Jedel is-sharalardyń nátıjesinde urlanǵan barlyq bólshek tabylyp, zattaı dáleldeme retinde iske tirkeldi.
Qazir atalǵan fakti boıynsha sotqa deıingi tergeý amaldary júrgizilip jatyr.
Aıta keteıik, Aqmola oblysynda esirtki jasyryp júrgen 19 jastaǵy turǵyn ustaldy.