Quny 32,5 mlrd teńge: Almaty oblysynda farmatsevtıkalyq zaýyt salynady
ASTANA. KAZINFORM — Úkimet Almaty oblysynda jalpy quny 32,5 mlrd teńge bolatyn farmatsevtıkalyq zaýyt qurylysynyń jobasyn maquldady.
Elimizde Memleket basshysynyń tapsyrmalaryna sáıkes, otandyq dárilik zattar óndirisiniń úlesin arttyrýǵa baǵyttalǵan jobalardy júzege asyrý jalǵasyp jatyr. Atalǵan jumys aıasynda Qazaqstan Respýblıkasynyń Úkimeti Densaýlyq saqtaý mınıstrligi men «Steppe pharmaceuticals» JShS arasynda jasalǵan Almaty oblysyndaǵy «Alataý» AEA aýmaǵynda tolyq tsıkldi bıofarmatsevtıkalyq keshen salý jónindegi ınvestıtsııalar týraly kelisimdi maquldady. Premer-mınıstr Oljas Bektenov tıisti qaýlyǵa qol qoıdy.
— Jeke ınvestıtsııalardyń jalpy kólemi 32,5 mlrd teńgeni quraıdy. Jańa óndiris joǵary tehnologııalyq óndiristik qýattardy lokalızatsııalaýǵa jáne damytýǵa baǵyttalǵan. Farmatsevtıkalyq zaýyt dárilik preparattyń 20 túrin shyǵarýdy josparlap otyr. Olardyń qatarynda onkologııalyq jáne sırek kezdesetin aýrýlardy emdeýge arnalǵan dáriler, sondaı-aq zamanaýı ımmýnobıologııalyq preparattar bar, — delingen habarlamada.
Kásiporyndy iske qosý 2031 jylǵa, jobalyq qýatqa shyǵý 2032 jylǵa, al negizgi baǵyttar boıynsha tolyq tsıklge kóshý 2034 jylǵa josparlanǵan. Dári-dármek óndirý men sertıfıkattaýdan bólek, ǵylymı-zertteý jáne tájirıbelik-konstrýktorlyq jumystar da qarastyrylǵan. Óziniń R& D baǵytyn damytý, onyń ishinde bıoekvıvalenttilik zertteýlerin júrgizý, tirkeý qujattaryn daıyndaý jáne halyqaralyq GMP standarttaryn engizý josparlanǵan.
Budan bólek, keshen bazasynda qazaqstandyq mamandardy oqytý jáne biliktiligin arttyrý júıesi qurylady. Jobany júzege asyrý eldiń dárilik qaýipsizdigin nyǵaıtýǵa jáne Almaty oblysy aýmaǵynda zamanaýı farmatsevtıkalyq óndiris ınfraqurylymyn qalyptastyrýǵa múmkindik beredi. Shamamen 60 jańa jumys orny ashylady.
Jalpy qazirgi tańda elde farmatsevtıkalyq óndiris salasynda 8 iri ınvestıtsııalyq joba júzege asyrylyp jatyr. Farmatsevtıka salasy oń dınamıka kórsetip otyr. Ótken jyldyń qorytyndysy boıynsha otandyq farmatsevtıkalyq ónim óndirisiniń kólemi 191,1 mlrd teńgege jetip, 2024 jylmen salystyrǵanda 8,7%-ǵa ósken. Salaǵa tartylǵan jalpy ınvestıtsııa kólemi 390 mlrd teńgeden asty. Almaty oblysynda salynatyn bul keshen ımportqa táýeldilikti azaıtyp, qazaqstandyqtardy sapaly ári ómirlik mańyzdy dári-dármekpen qamtamasyz etýge múmkindik beretin mańyzdy jobalardyń biri bolmaq.
Buǵan deıin Qazaqstanda keıingi úsh jylda otandyq farmatsevtıkalyq ónimderdi satyp alý kólemi 38%-ǵa artqanyn jazdyq.
