Quny 28,5 mln teńge bolatyn 352,56 tonna bıdaıdy satyp jibergen basshy sottaldy
ASTANA. KAZINFORM — Jitiqara aýdandyq sotynda «Eklıps Agro» JShS dırektorynyń isi boıynsha úkim shyǵaryldy.
— Aıyptaý materıaldaryna sáıkes, 2024 jyldyń qazan aıynda ol sharýa qojalyǵyna tıesili, quny 28,5 mln teńge bolatyn 352,56 tonna bıdaıdy alǵan. Keıin astyqqa qatysty qujattar «Eklıps Agro» JShS atyna qaıta rásimdelip, bıdaı menshik ıesiniń kelisiminsiz úshinshi tulǵalarǵa satylǵan.
Budan bólek, aıyptaý nusqasy boıynsha, kompanııa úsh tasymaldaýshyǵa kórsetilgen kólik qyzmetteri úshin jalpy somasy 11,1 mln teńgeni tólemegen, — delingen habarlamada.
Qorǵaý tarapy taraptar arasynda birlesken sharýashylyq qyzmet bolǵanyn alǵa tartty. Alaıda prokýror birlesken qyzmet týraly sharttyń, sondaı-aq bóten astyqqa bılik etý quqyǵyn rastaıtyn qujattardyń joq ekenin atap ótti.
Memlekettik aıyptaýshy sottalýshyny 8 jylǵa bas bostandyǵynan aıyrýdy surady. Sot ony kináli dep tanyp, 6 jylǵa bas bostandyǵynan aıyrý jazasyn taǵaıyndady. Sonymen qatar, sottalýshy 6 jyl merzimge belgili bir laýazymdardy atqarý quqyǵynan aıyryldy.
Úkim zańdy kúshine engen joq.
Aıta ketelik Qostanaı oblysynda shekaradan 10,6 mln teńgeniń temekisi tárkilengen edi.
