Quny 2,6 mlrd teńge bolatyn temekini elimizge zańsyz kirgizgender sottaldy - QMA

ASTANA. KAZINFORM - Semeı qalasynda kontrafaktilik temekilerdi iri kólemde zańsyz aınalymǵa túsirgen transulttyq toptyń 3 múshesine qatysty aıyptaý úkimi shyǵaryldy, dep habarlaıdy QR Qardylyq monıtorıng agenttiginiń baspasóz qyzmeti.

Tergeýdi agenttiktiń Abaı oblysy boıynsha departamenti júrgizdi.

Tergeý barysynda 8 adam, onyń ishinde 3 shetel azamatyn qamtyǵan qylmystyq toptyń Qyrǵyzstannan jalǵan qujattar arqyly 9,3 mln qorap kontrafaktilik temekini zańsyz kirgizgeni anyqtaldy.

Temeki ónimderi Almaty, Jambyl, Pavlodar jáne Túrkistan oblystarynyń aýmaǵynda satylǵan. Sonymen qatar, qylmyskerler kontrafaktilik taýardyń bir bóligin Reseıge shyǵarmaq bolǵan.

Barlyq zańsyz ónim aınalymnan alynyp, tólenbegen aktsız somasy 2,6 mlrd teńgeni qurady.

Múlikti tárkileý maqsatynda 9 avtokólik pen jeke turǵyn úıge tyıym salyndy.

Sonymen qatar, tergeý barysynda sot qylmystyq jolmen alynǵan múlikti aldyn ala tárkileý týraly ótinishterdi qanaǵattandyrdy: 157 myń AQSh dollary kólemindegi qolma-qol aqsha jáne quny 840 myń teńge turatyn «777» VIP avtonómir tárkilendi.

Sot úkimimen D.Bekeshev, D.Satybaldıev, D.Sýltanov QR QK 264-babynyń 2-bóligi (transulttyq uıymdasqan topqa qatysý), 214-babynyń 2-bóligi 1) jáne 3) tarmaqtary (zańsyz kásipkerlik) boıynsha kináli dep tanylyp, 8 jylǵa bas bostandyǵynan aıyrý jazasyna kesildi jáne 166 mln teńge turatyn barlyq tárkilengen múlikti memleket menshigine alyndy.

Qalǵan 5 qatysýshyǵa halyqaralyq izdeý jarııalanǵan. Olardyń biri Reseı Federatsııasy aýmaǵynda ustalyp, ony ekstradıtsııalaý týraly ótinish tıisti organdarǵa joldandy.

Osyǵan deıin Qarjylyq monıtorıng agenttigi 150 myńǵa jýyq aktsızsiz temeki satýshylardy quryqtaǵan bolatyn.