Quny 2,3 mlrd teńgeden asatyn 98 myńnan astam esirtki shoty buǵattaldy
ASTANA. KAZINFORM — 2025 jyldyń ótken kezeńinde quqyq qorǵaý jáne arnaıy organdar esirtki jáne psıhotroptyq zattardy jetkizýdiń 111 (135) arnasynyń jolyn kesti. Bul týraly Bas prokýratýranyń baspasóz qyzmeti habarlady.
Bas prokýratýramen ýákiletti organdar esirtki jáne prekýrsorlardy jetkizý arnalaryn, esirtki zerthanalaryn joıýǵa, qylmystyq toptar men esirtki bıznesin uıymdastyrýshylardy anyqtaýǵa, qylmystyq kirister men múlikke tyıym salýǵa, sondaı-aq olarǵa kómektesetin quqyq qorǵaý organdarynyń qyzmetkerlerin áshkereleýge baǵdarlandy.
Bul baǵytta sapaly tergeý amaldaryn júrgizý arqyly Mańǵystaý, Ulytaý oblystary, Almaty jáne Shymkent qalalarynda esirtki dúkenderin uıymdastyrýshylardy áshkerelegen arnaıy prokýrorlar úlken jumys atqardy.
— Prokýratýra organdarynyń úılestirýimen 2025 jyldyń ótken kezeńinde quqyq qorǵaý jáne arnaıy organdar esirtki jáne psıhotroptyq zattardy jetkizýdiń 111 (135) arnasynyń jolyn kesti. Sıntetıkalyq esirtki óndiretin 21 (11) zerthana jáne quramynda esirtki zattary bar ósimdikterdi zańsyz ósirýdiń 125 (45) faktisi anyqtalyp, joıyldy. Zańsyz aınalymnan 9 (19) tonna esirtki (onyń ishinde 254 kg sıntetıkalyq esirtki) jáne 12 tonna (105 kg) prekýrsorlar tárkilendi. Esirtki jáne prekýrsorlar kontrabandasynyń faktileri tómendetildi (182-den 80-ge deıin, 56%-ǵa), — delingen habarlamada.
Jyl basynan beri Bas prokýratýra quqyq qorǵaý organdary men ekinshi deńgeıdegi bankterdiń jumysyna ınternet keńistigindegi esirtki dúkenderine baılanysty banktik shottardy anyqtaý, buǵattaý jáne tárkileý algorıtmin engizdi.
Qazirgi ýaqytta quny 2,3 mıllıard teńgeden asatyn 98 myńnan astam esirtki shoty buǵattaldy.
Barlyq is boıynsha qarjylyq tergeý júrgizý, sonyń ishinde, qylmystyq aqshany, esirtki bıznesiniń túpkilikti benefıtsıarlary men uıymdastyrýshylaryn, sondaı-aq «dropper» aýdarymdary jáne basqa da zańsyz operatsııalar úshin banktik shottaryn usynatyn azamattardy anyqtaý týraly nusqaý berildi.
Sonymen qatar, quqyq qorǵaý jáne memlekettik organdar «Kıbernadzor» aqparattyq júıesi arqyly esirtki dúkenderin buǵattaý jumystaryn júrgizip jatyr. Búginde 6 myńnan astam esirtki saıty buǵattaldy.
Aıta ketelik Almaty men Almaty oblysynda uıymdasa esirtki taratqandar ustaldy.