Quny 2,2 mlrd teńge orman qorynyń jeri memleketke qaıtaryldy: jer kimge beriledi

ASTANA. KAZINFORM —  Aqmola oblysy prokýratýrasy quny 2,2 mlrd teńge bolatyn orman qorynyń jer ýchaskelerin memleketke qaıtardy. Bul týraly Aqmola oblysynyń prokýratýrasy habarlady. 

Aqkól aýdanynyń prokýratýrasy aýdannyń týrıstik klasterin damytýǵa kedergi keltiretin problemalyq máselelerdi sheshý maqsatynda orman zańnamasy talaptarynyń saqtalýyna udaıy negizde taldaý júrgizip jatyr.

Orman paıdalanýshylarynyń saýyqtyrý, rekreatsııalyq, týrıstik jáne sporttyq is-sharalar júrgizý úshin jalǵa berilgen memlekettik orman qory ýchaskelerin maqsatyna sáıkes paıdalanbaǵan derekteri anyqtaldy.

— Prokýrorlyq qadaǵalaý sharalarynyń nátıjesinde jalpy kadastrlyq quny 2,2 mlrd teńge bolatyn memlekettik orman qorynyń 10 jer ýchaskesi memleketke qaıtarylyp, olardy týrıstik bıznesti uıymdastyrý úshin áleýetti ınvestorlarǵa berý múmkindigi jasaldy, — delingen habarlamada.

Atalǵan basym baǵyttaǵy jumys jalǵasyp jatyr. 

Aıta ketelik elorda ákimdigi 38 jer ýchaskesin 1 mlrd teńgege satyp alatyny týraly jazǵan edik.