«Quny – 22 mln teńge»: Jambyl oblysynda kásiporyn basshylary 4 avtokólikti jalǵan qujattarmen satqan

Talas aýdanynyń prokýratýrasy «Taza-Talas» sharýashylyq júrgizý quqyǵyndaǵy kommýnaldyq memlekettik kásipornynyń teńgerimindegi avtokólikterdi zańsyz esepten shyǵarý arqyly jymqyrý faktilerin anyqtady, dep habarlaıdy Kazinform. 

Jambyl oblysy prokýratýrasynyń málimetinshe, kásiporyn basshylyǵy mekemege tıesili naryqtyq quny 22 mln teńge bolatyn 4 avtokólikti jalǵan qujattar rásimdeý arqyly jaramsyz kólik quraldary retinde zańsyz esepten shyǵaryp, tıisti aýktsıon ótkizbeı, tikeleı úshinshi tulǵalarǵa satqan.

Atalǵan derek boıynsha Talas aýdanynyń prokýratýrasy qylmystyq is tirkedi. Ony tergep-tekserý isin oblys prokýratýrasynyń sotqa deıingi tergep-tekserý basqarmasy júrgizdi.

Qazirgi tańda mekeme basshylarynyń is-áreketteri QK-tiń 189-baby 4-bóliginiń 2-tarmaǵymen (jymqyrý) jáne QK 369-baby 1-bóligimen (qyzmettik jalǵandyq) saralandy.

Tergep-tekserý barysynda quny 17 mln teńge 3 avtokólik memleketke qaıtaryldy. Tórtinshi avtokólikti qaıtarýǵa shara qabyldanyp jatyr.

Qylmystyq is sotqa joldanady.