Quny 103 mlrd teńge: Elimizde tolyq tsıkldi bıofarmatsevtıkalyq keshen salynady
ASTANA. KAZINFORM — Onda onkologııalyq, aýtoımmýndy, sırek jáne qabyný aýrýlaryn emdeýge arnalǵan preparattar shyǵarylady dep josparlanǵan, dep habarlaıdy Úkimettiń baspasóz qyzmeti.
QR Prezıdentiniń farmatsevtıka salasyndaǵy otandyq óndiristiń úlesin 50%-ǵa jetkizý jónindegi tapsyrmalaryn oryndaý sheńberinde Qazaqstanda iri strategııalyq ınvestıtsııalyq joba júzege asyrylady.
Tıisti qaýlyǵa Premer-mınıstr Oljas Bektenov qol qoıdy. Qujatta QR Densaýlyq saqtaý mınıstrligi men «Khan Tengri Biopharma» JShS arasyndaǵy «Alataý» arnaıy ekonomıkalyq aımaǵynda zamanaýı «Bıofarmatsevtıkalyq tolyq tsıkldi keshen salý» jónindegi ınvestıtsııalar týraly kelisim jobasy maquldandy.
Nysan dárilik zattar óndirisiniń ozyq tehnologııalarymen jabdyqtalady dep josparlanǵan. Negizgi maqsat — 58 preparat túrin shyǵaratyn óndiris qýatyn qurý. Tolyq tsıkldi iske qosýǵa, onyń ishinde belsendi farmatsevtıkalyq ıngredıentter óndirýge erekshe nazar aýdarylady.
Keshenniń óndiristik portfeline 27 halyqaralyq patenttelmegen ataýy bar, sonyń ishinde onkologııalyq, aýtoımmýndy, sırek jáne qabyný aýrýlaryn emdeýge arnalǵan preparattar kiredi.
Investıtsııalardyń jalpy kólemi 103 mlrd teńgeden asady. Keshende 180-nen astam jańa turaqty jumys orny ashylady. Jobany júzege asyrý elimizdiń farmatsevtıka salasyn damytýda strategııalyq mańyzǵa ıe jáne lokalızatsııany keńeıtýge, ornyqty óndiristik bazany qalyptastyrýǵa, sondaı-aq áleýmettik mańyzy bar preparattardyń ımportyn kezeń-kezeńimen almastyrýǵa baǵyttalǵan.
Odan bólek, shyǵarylatyn ónimniń bir bóligin EAEO, TMD elderiniń, sondaı-aq Taıaý Shyǵys memleketteriniń naryqtaryna eksporttaý josparlanyp otyr.
Budan buryn depýtat Janna Asanova júıeli qaıshylyq farmatsevtıka salasynyń damýyna kedergi keltirip otyrǵanyn aıtqan edi.