Kúngeılik ónerpazdar elordanyń týǵan kúnine syı-tartý jasady
ASTANA. QazAqparat - Ońtústik Qazaqstan oblysynyń ákimi B.Atamqulovtyń bastamasymen jáne oblystyq mádenıet basqarmasynyń uıymdastyrýymen jerlesterimiz astanalyqtarǵa «Án men kúı áldıleıdi Astanany» atty merekelik baǵdarlamasyn usyndy.
Aldymen Kongress-Holl foıesinde el Táýelsizdiginiń 25 jyldyǵyna arnalǵan óner sheberleriniń jyljymaly kórmesi ótti. Mádenı sharada «Nuryn shashqan - Ońtústik fotosýretteri», «Shynaıy nyshan, arnaý», «Ońtústik Qazaqstan oblysynyń tarıhy», «Uly Otan soǵysyndaǵy qazaq batyrlary» atty 4 bólimnen quralǵan qundy dúnıeler tanystyryldy. Aıtýly kórmege 72-den astam Táýelsizdik jyldaryndaǵy Elbasynyń Ońtústikke is-saparynyń barysynda mádenıet qyzmetkerleri, eńbek ardagerleri, jastarmen kezdesýiniń fotosýretteri jasaqtalyp, qoıyldy. Sonymen qatar, Shymkent shaharynda boı kótergen ǵımarattardyń, eskertkishterdiń fotosýretteri, tarıhı kezeńder beınelengen keskindemelik kartınalardy da elordalyqtar tamashalaýǵa múmkindik aldy. Al atalǵan kórmeni arqadaǵy aǵaıynǵa jergilikti murajaıdyń mamandary men qylqalam sheberleri aralatyp, árbir dúnıeni etene tanystyrdy. Qaýmalaǵan jurtshylyq ásirese sýretshi A.Ospanovtyń shyǵarmalaryna qyzyǵýshylyq tanytty.
Bas qalanyń týǵan kúninde jerlesimiz, áıgili sýretshi, qazaqı qoldanbaly ónerdiń has sheberi Quttybek Jaqypov ta tosylmady. Rýhanı syı-tartý jasady. Astanaǵa degen qurmet -yqylasyn on saýsaqtyń qudyretimen jetkizdi. Óner ıesi jyldar boıǵy eńbegin elordalyqtardyń nazaryna usyndy. Qazaqtyń tól óneri men eldiń taǵdyry kórinis tapqan folklorlyq-mıfologııalyq saryndaǵy gobelenderdi tamashalaýshy turǵyndardyń da qarasy qalyń boldy. Endi qolóner sheberiniń júzdegen týyndylary qyrkúıek aıynyń 15-shi juldyzyna deıin «Táýelsizdik saraıynyń» tórinen tabylmaq.
Sondaı-aq, QR Táýelsizdiginiń 25 jyldyǵy men Astana kúni merekesine Ońtústik Qazaqstan oblysynyń óner sheberleri Kongress-Holl zalynyń sahnasynda «Án men kúı áldıleıdi Astanany» atty Gala-kontsertin ótkizdi. Kontsertke arnaıy kelip qatysqan oblys ákiminiń orynbasary U.Sádibekov óńir basshysy joldaǵan quttyqtaý sózin jetkizdi. Mádenıet salasynyń atqarǵan jumystary men birqatar jetistikterin marqaıa aıtty. Al aıtýly merekelik kontsertte Sh.Qaldaıaqov atyndaǵy oblystyq fılarmonııanyń ánshileri, «Súgir» atyndaǵy qazaq ult aspaptar orkestri, «Qazyna», «Tumar» bı ansamblderi, oblystyq opera jáne balet teatry men oblystyq ázil-syqaq jáne satıra teatrynyń ártisteri óner kórsetip, kópshiliktiń qurmet-yqalasyna bólendi. Jergilikti sazgerler, onyń ishinde Sh.Qaldaıaqovtyń shyǵarmalary da sahnany ánmen áldıledi. Jerlesterimiz álemniń jahuttaryna aınalǵan klassıkalyq eńbekterdi de eńserdi. Bekzat óner - operada da syrshyl sazdy shyǵarmalar sharyqtaı shyrqaldy. Al dástúrli ánder halyqtyń tól ónerin jańǵyrtty. Sóz sońynda astanalyq aǵaıyn, zaldaǵy kórermen qaýym rýhanı syı-tartý ázirlep, ony úlken qurmetpen usynǵan Ońtústiktiń ónerpazdaryna alǵysyn jaýdyrdy. Qazaqtyń tól óneri jańǵyryp, ulttyq-aspaptarda kúıdiń shertilgen keshin kópten beri tamashalamaǵanyn aıtyp aǵynan jaryldy. Tyń baǵdarlamaǵa tánti bolysty. Aıta óteıik, oblystyq mádenıet basqarmasy basshylyǵynyń málimetinshe, osynaý merekelik dýmandy quttyqtaýǵa kúngeılik 160-qa jýyq ónerpaz jumylǵan.
