Qundylyqtarǵa negizdelgen mektep kontseptsııasymen jumys isteýimiz kerek - Darhan Óte

NUR-SULTAN. QazAqparat – Zertteý jumystary rýhanı tárbıeni negizge alǵan bilim oryndary akademııalyq jaǵynan da jetistikke jetip otyr. Bul týraly «Rýhanı damý jáne ulttyq dástúrlerdi saqtaý» taqyrybynda ótken dóńgelek ústelde «Bilim ınnovatsııa» Halyqaralyq qorynyń prezıdenti Darhan Óte aıtty, dep habarlaıdy QazAqparat tilshisi.

«Biz óz kontseptsııamyzdy «qundylyqtarǵa negizdelgen mektep» dep berip otyrmyz. Bul oıdyń negizgi túıini: Elbasymyz «Rýhanı jańǵyrý: bolashaqqa baǵdar» maqalasynda aıtyp ótkendeı, ulttyq qundylyqtarymyzdyń tozyq jaǵynan qalaı bas tartyp, ozyq jaǵyn qalaı jandandyratynymyz týraly mamandarmen aqyldasyp, bilim-ınnovatsııa lıtseılerinde 30 jyl boıy jasap kele jatqan tárbıe jumystaryn zerdelep, osy másele halyqaralyq deńgeıde qalaı júrip jatqanyn zerttep, QR Bilim jáne ǵylym mınıstrine osy kontseptsııany usyndyq. Bul kontseptsııa bilim men ǵylymdy damytýdyń bes jyldyq josparyna kirgizildi», - deıdi Darhan Óte.

Onyń aıtýynsha, zertteý jumystary rýhanı tárbıeni negizge alǵan bilim oryndary akademııalyq jaǵynan da jetistikke jetip otyrǵandaryn dáleldep otyr.

«HHІ ǵasyr jastaryna qandaı daǵdy, qabilet qajet? Eń aldymen erkin oılana alatyn, rýhy, sanasy azat, adamgershilik, meıirimdilik, otansúıgishtik sııaqty qundylyqtardy boıyna sińirgen, zamanaýı bilimdi, HHІ ǵasyrǵa saı, álem azamatyna saı daǵdylardy boıyna sińirgen azamattardy daıyndap shyǵarý - barlyq otbasy, barlyq bilim berý oryndary men qoǵamnyń basty máselesi. Biz lıtseılerde 18 qundylyqty tańdap, bastaýysh, orta, joǵary synyptarǵa ádistemelik kitap daıyndap shyqtyq. Qazirgi urpaq ámir berip sóılesýdi qabyldamaıdy, olarmen teń dárejede sóılesý kerek. Ár aıda bir qundylyqty dáripteımiz. Mysaly, osy aıdaǵy taqyryp «meıirimdilik» bolsa - sabaq josparyna kirgizip, sabaq ústinde osy taqyrypqa toqtalyp ótý kerek. Ár pán muǵalimi ómirden mysaldar keltire otyryp oqýshynyń sanasyna áser etýi kerek», - deıdi ol.