«Kúndelik» elektrondyq júıesinde balalarǵa jat jarnama taraǵan – Oqý-aǵartý vıtse-mınıstri
ASTANA. KAZINFORM – Oqý-aǵartý mınıstrligine ata-analardan «Kúndelik» elektrondyq jýrnalynda jarnamalyq kontentke qatysty kóptegen shaǵym túsken. Bul týraly Oqý-aǵartý vıtse-mınıstri Araı Ýrazova málim etti.
«Barlyq bilim berý tehnologııalary men EdTech salasyndaǵy júıeler, sonyń ishinde «Kúndelik» avtomattandyrylǵan aqparattyq júıesi, Qazaqstan Respýblıkasynyń zańnamasyna sáıkes jumys júrgizedi. Alaıda, buryn mınıstrlik atyna ata-analar qaýymdastyǵynan «Kúndelik»-tegi jarnamalyq kontentke qatysty kóptegen shaǵymdar kelip túsken bolatyn. Bul kontent oqýshylardyń jas erekshelikteri men psıho-emotsıonaldyq jaǵdaılaryna sáıkes kelmegen. Sonymen qatar, «Kúndelik» tarapynan mindettemelerdiń oryndalmaý jaǵdaılary oryn aldy, bul másele júıe ázirleýshilerimen birneshe ret talqylandy. Kórsetiletin qyzmetterdiń sapasyn arttyrý qajettiligine nazar aýdaryp, kelisim júrgizildi», - dep jazdy Araı Ýrazova jelidegi jeke paraqshasynda.
Vıtse-mınıstrdiń málimdeýinshe, búginde barlyq ınternet-resýrstar arqyly «Kúndelik» júıesine qoljetimdilikti qamtamasyz etý boıynsha jumys jalǵasýda.
Onyń aıtýynsha, aqparattyq júıeler salasyndaǵy barlyq ózgerister men jańalyqtar zań talaptaryn saqtaı otyryp jáne bilim berý úderisine barlyq qatysýshylardyń múddelerin eskere otyryp júzege asyrylady.
«Qazaqstan Respýblıkasynyń «Bilim týraly» Zańyna sáıkes, jergilikti atqarýshy organdarǵa qarasty mektepter EdTech salasyndaǵy bilim berý tehnologııalary men júıelerin óz betinshe tańdaý quqyǵyna ıe ekenin atap ótken jón. Básekelestikti qorǵaý jáne damytý agenttiginiń (BQDA) habarlamasyna baılanysty, mınıstrlik barlyq qajetti mindettemelerdi ýaqtyly oryndap, tolyq kólemde túsindirdi. Qazirgi ýaqytta jaǵdaı retteldi. Mınıstrlik óz tarapynan oqýshylar, pedagogtar jáne ata-analar múddesi úshin bilim berý uıymdaryn sapaly ári qaýipsiz tsıfrlyq quraldarmen qamtamasyz etý boıynsha jumysty jalǵastyrady», - deıdi ol.
Eske sala ketsek, «Kúndelik» elektrondyq júıesi aınalasyndaǵy daý byltyr bastalǵan edi. Májilis depýtaty Erlan Saıyrov 4 mıllıon oqýshynyń jeke málimeti sheteldik kompanııaǵa berilgenin málim etti.
Bıyl Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Kundelik.kz resýrsynyń qaýipsizdik deńgeıi týraly pikir bildirdi.