Kundelik vs. BilimClass: Almaty mektepterinde elektrondy kúndelik qalaı aýysty
ALMATY. KAZINFORM — Jyl basynan beri qoǵamda Almatydaǵy jalpy bilim beretin mektepterdiń Kundelik tsıfrlyq bilim berý platformasynan BilimClass júıesine kóshýi qyzý talqylanyp jatyr. Kazinform agenttigi tilshisi osy máseleniń mán-jaıyn anyqtaýǵa tyrysty.
Kundelik ustanymy
Kundelik kompanııasynyń bas dırektory ári negizin qalaýshy Muhtar Іlııasovtyń aıtýyna qaraǵanda, 2025 jylǵy 26 jeltoqsannan bastap júıede kúmán týdyratyn belsendilik baıqalǵan. Onyń sózinshe, bul — derekterdi ruqsatsyz jappaı júkteý áreketi jáne ol Qazaqstan Respýblıkasynyń «Derbes derekter jáne olardy qorǵaý týraly» zańyn óreskel buzý bolyp esepteledi.
Spıkerdiń dereginshe, bul áreketter Almatydaǵy 219 memlekettik mekteptiń málimetin qamtyǵan. Atap aıtqanda, shamamen 310 myń oqýshynyń, 220 myńnan astam ata-ananyń jáne 25 myńǵa jýyq pedagogtiń jeke deregi júktelgen. Olardyń ishinde 2018 jyldan bergi synyp jýrnaldary, kúntizbelik-taqyryptyq josparlar, úlgerim tabelderi, sabaq kesteleri men eseptik qujattar bar.
— Ár mektep boıynsha júktelgen derekterdiń ortasha kólemi búkil arhıvtik málimetterdi qosa alǵanda, shamamen 5 Gb boldy. Bul derekter «bilim basqarmasy men mektepterdiń qajettiligi úshin arhıvteý» degen jeleýmen júıeli túrde BilimClass platformasyna kóshirilgen, — dedi Muhtar Іlııasov.
Onyń aıtýynsha, mundaı jaǵdaı tek Almatyda tirkelgen. Sonymen qatar ýákiletti organdar tarapynan kompanııaǵa osy máselege qatysty eshqandaı resmı habarlama da, túsindirme de berilmegen.
Osyǵan baılanysty Kundelik Almaty ákimine, Prezıdent Ákimshiligine, QR Oqý-aǵartý mınıstrligine, Ulttyq qaýipsizdik komıtetine, Jasandy ıntellekt jáne tsıfrlyq damý mınıstrliginiń Aqparattyq qaýipsizdik komıtetine jáne Bas prokýratýraǵa resmı ótinishter joldaǵan. Alaıda suhbat alynǵan ýaqytqa deıin bul ótinishterge eshbir jaýap kelip túspegen.
Kundelik-tiń qoldanylý geografııasy
Kompanııa ókilderi barlyq mektep júıege memlekettik-jekemenshik áriptestik kelisimderi aıasynda jáne QR Oqý-aǵartý mınıstrliginiń Ulttyq bilim berý derekter qory anyqtamalyǵy negizinde tirkelgenin habarlady.
— Qazirgi ýaqytta Kundelik Almatydaǵy jumysyn jalǵastyryp jatyr, munda jekemenshik mektepterdiń basym bóligi bizdiń platformany tańdap otyr. Sonymen qatar júıe Astanada, Shymkentte jáne Almaty, Jambyl, Shyǵys Qazaqstan, Pavlodar, Batys Qazaqstan jáne Atyraý oblystarynda keńinen qoldanylady. Aıta ketý kerek, Kundelik.kz Almatynyń memlekettik mektepteri úshin áli de qoljetimdi, — dedi Іlııasov.
Ol josparlary týraly aıtyp, kompanııanyń bilim basqarmasy jáne memlekettik organdardan resmı túsinik alýǵa nıeti bar ekenin jetkizdi.
— Qazir zańgerlermen birge barlyq máseleni quqyq turǵysynan sheshýge tyrysyp jatyrmyz. Al servıstiń barlyq jelisi qalypty rejımde jumys istep, óńirlerdegi bilim basqarmalary, QR Oqý-aǵartý jáne Qarjy mınıstrlikteri tarapynan qoıylǵan mindetterge saı damýyn jalǵastyryp jatyr, — dedi ol.
Petıtsııa jáne BilimClass reaktsııasy
Sonymen qatar E-Petition.kz portalynda Almaty mektepteriniń oqý jylynyń ortasynda jańa platformaǵa kóshýine alańdaýshylyq bildirgen petıtsııa jarııalandy. Petıtsııa avtorlary tsıfrlyq júıeni oqý protsesiniń dál ortasynda ózgertý onyń tıimdiligine kesirin tıgizip, muǵalimderge qosymsha júkteme túsirýi jáne ata-analar men oqýshylar úshin qolaısyzdyq týdyrýy múmkin ekenin aıtyp otyr. Sondaı-aq, olardyń pikirinshe, BilimClass-tyń qazirgi nusqasy birqatar kórsetkish boıynsha Kundelik-ten tómen kórinedi.
Al Bilim Group IT-holdınginiń baspasóz qyzmeti jańa platforma Almatydaǵy 15 mektepte pılottyq rejımde synaqtan ótkenin habarlady. Testileý nátıjesinde mektep ákimshiligi men pedagogter BilimClass júıesiniń talaptarǵa tolyq saı keletinin rastaǵan.
— Oqý protsesine kedergi keltirmeý úshin platformany aýystyrý qysqy demalys kezinde uıymdastyryldy, al muǵalimderge júıeni paıdalaný boıynsha arnaıy oqytý júrgizildi. Platformanyń negizgi mindetteriniń biri — kúndelikti qaıtalanyp isteletin jumystardy avtomattandyryp, pedagogterdiń jumysyn azaıtý. Sol sebepti bul ózgeris olarǵa qosymsha aýyrtpalyq ákelmeıdi, — dep málimdedi kompanııa.
Sonymen qatar muǵalimder men ata-analardy qoldaý úshin call-ortalyq iske qosylyp, qajet bolǵan jaǵdaıda onlaın keńes berý qyzmeti de jumys istep tur.
Derbes derekter máselesi
Bilim Group Kundelik basshysynyń derbes derekterdiń ruqsatsyz júktelgeni týraly málimdemesine de túsinik berdi.
— Bul aqparat shyndyqqa sáıkes kelmeıdi. Kundelik júıesinen BilimClass platformasyna eshqandaı jeke derekter berilgen joq. Munda tek mektepterdiń ishki arhıvteri týraly sóz bolyp otyr. Derekter úshinshi tulǵalarǵa berilmegen jáne BilimClass júıesine júktelmegen. Bul sharalar eń áýeli bilim sapasyn baqylaý departamentindegi attestatsııadan ótý úshin qajet boldy. Barlyq arhıvteý jumysy zań talaptary men aqparattyq qaýipsizdik normalaryn saqtaı otyryp júrgizildi, — dep habarlady kompanııa ókilderi.
Sondaı-aq kompanııa bilim basqarmasy jeke derekterdiń taralýy nemese zańsyz berilýi jónindegi aqparatty joqqa shyǵaratyn resmı túsinik bergenin atap ótti.
BilimClass pen Kundelik-tiń aıyrmashylyǵy nede
Bilim Group málimetinshe, BilimClass — otandyq platforma, onda qazaqstandyq bilim berý kontenti qoldanylady jáne serverlik ınfraqurylym tolyqtaı el aýmaǵynda ornalasqan.
Platforma men mobıldi qoldanba oqýshylar, ata-analar jáne pedagogter úshin tegin. Muǵalimder elektrondy jýrnal, kúntizbelik-taqyryptyq josparlaý, ınteraktıv sabaqtar, baǵalardy avtomatty esepteý, BJB men TJB katalogtary, chattar jáne analıtıkalyq quraldardy qoldanady. Al mektep basshylyǵy oqý protsesiniń tolyq tsıfrlyq tarıhyna jáne úlgerim analıtıkasyna naqty ýaqyt rejıminde qol jetkize alady.
Sonymen qatar mektepter BilimLand, iTest jáne iMektep sııaqty bilim berý ónimderi biriktirilgen ekojúıege qosylǵan.
Engizý aýqymy jáne qarjylandyrý
2025-2026 oqý jylynyń úshinshi toqsanynda Almatydaǵy 225 memlekettik mekteptiń barlyǵy BilimClass júıesine kóshti. Platformada 314 275 oqýshy men 22 021 muǵalimniń deregi bar. Kompanııa málimetinshe, kóshý qalypty rejımde ótken, mektepter tarapynan daý týdyrǵan jaǵdaı tirkelmegen.
Bilim Group ókilderi platformany paıdalaný úshin bıýdjettik qarjylandyrý qajet emes ekenin erekshe atap ótti.
— BilimClass barlyq óńir úshin tolyqtaı tegin. Qazirgi tańda platformada Almaty men Qazaqstannyń 11 óńirinde 2,5 mln oqýshy jáne 350 myń muǵalim jumys istep jatyr. Kóshýge baılanysty týyndaǵan barlyq shyǵyndy — oqytý, keńes berý, tehnıkalyq qoldaý jaǵyn ónimniń ózi moınyna alady, — dedi kompanııa ókilderi.
Kazinform agenttigi QR Oqý-aǵartý mınıstrligi men Almaty bilim basqarmasyna qala mektepteriniń oqý jyly ortasynda Kundelik platformasynan BilimClass júıesine kóshýiniń sebepteri men qabyldanǵan sheshimniń negizderi jóninde resmı saýal joldady. Qazir jaýapty kútip otyrmyz.
Buǵan deıin Almaty mektepteriniń Kundelik ornyna jańa elektrondy jýrnalǵa kóshkeni habarlanǵan edik.
Sondaı-aq byltyr jyl sońynda mektepterge arnalǵan biryńǵaı elektrondy bilim berý ortasyn ázirleýshi Kundelik kompanııasy oqýshylardyń jeke derekteri tarady degen aqparatty resmı túrde joqqa shyǵarǵan edi.