«Kúndeliktiń» qyzmeti úshin aqy alý zańsyz - depýtat
ASTANA. QazAqparat - «Aqjol» fraktsııasy «Kúndelikke» qatysty depýtattyq saýaldy Úkimetke joldady, dep habarlaıdy QazAqparat tilshisi.
QR Parlament Májilisiniń depýtaty Keńes Absatırovtyń aıtýynsha, ótken jyly «Kúndelik» aqparattyq júıesi aqparattyq qaýipsizdik talaptarynan óte almady. Soǵan qaramastan, memlekettik-jekeshelik áriptestik týraly kelisimshartqa qol qoıyldy.
«Kúndelik» JShS dırektory Aleksandr Grıgorıan da, mınıstr de atalǵan júıeni qoldanǵany úshin aqy alynbaıtynyn talaı ret aıtqan. Bul degenimiz, elektrondy sabaq kestesi, elektrondy jýrnal, kúndelik, mekteptiń ishki jelisi, balanyń sabaq úlgerimi týraly esep, ádistemelik materıaldar, úı jumystary, muǵalimder men ata-analar arasyndaǵy habar almasý - bári-bári tegin bolýy shart. Ony kompıýter, gadjet pen smartofonǵa júkteý mindeti de bolmaýy qajet», - dedi K.Absatırov Májilistiń plenarlyq otyrysynda.
Onyń sózine qaraǵanda, búginde ata-analar arasynda «Kúndelikke» qatysty narazylyq kúsheıip keledi. Sebebi atalǵan júıeni uıaly telefonǵa júktep alǵannan keıin san alýan qyzmetter úshin qosymsha aqy tóleý qarastyrylǵan.
«Sonda aqyly qyzmetter týraly aldyn ala eskertý de jasalmaıdy. Ondaı áreketter kelisimshartqa qaıshy. Ol jerde anyq jazylǵan, arnaıy jáne qosymsha qyzmetter tek tutynýshynyń suraýy boıynsha ǵana usynylady. Bunyń bári aqyly qyzmetter týraly kelisimshartta kórsetilýi kerek. Al ondaı kelisim kompanııanyń resmı saıtynda joq», - dep atap kórsetti K.Absattırov.
«Aqjol» fraktsııasy óziniń depýtattyq saýalynda QR Premer-Mınıstriniń orynbasary Erbolat Dosaevtyń atyna joldady. Olar aqyly qyzmetterdi retteýmen birge «Kúndelik» júıesin aqparattyq qaýipsizdik talaptary boıynsha saraptap shyǵýdy surap otyr.
