Kundelik.kz sheteldiń arnaıy qyzmetterine qazaqstandyq oqýshylardyń málimetin berip otyr ma

ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Parlament palatalary birlesken otyrysynyń aldynda Kundelik.kz resýrsynyń qaýipsizdik deńgeıi týraly pikir bildirdi.

«Májilis depýtaty Ermurat Bápı Kundelik.kz resýrsy Qazaqstannyń aqparat qaýipsizdigine qaýip tóndirip turǵanyn, Reseıdiń arnaıy qyzmetteri ol jerden bizdiń málimetterdi alyp otyrǵanyn aıtty. Rasynda sondaı qaýip bar ma?», — dep surady jýrnalıst.

Mınıstr atalǵan resýrstyń aqparat qaýipsizdigi jónindegi testileýden ótken, ótpegenin bilmeıtinin aıtty. 

«Joq, aqparat qaýipsizdik jaǵynan búkil standarttar, normalar bar. Zań boıynsha ótý kerek, qazir mynaý Kundelik.kz aqparattyq qaýipsizdik jónindegi testileýden ótti me, joq pa, málimet joq. Men sizge málimet bereıin. Ony biz ótkizbeımiz. Memlekettik tehnıkalyq qyzmet kompanııasy bar. Sonyń bárin anyqtap, keıin tolyq málimet bereıin», — dedi Jaslan Mádıev.