Kundelik tóńiregindegi daý: Almaty mektepteri jańa platformada jumysyn jalǵastyryp jatyr
ALMATY. KAZINFORM – Bilim Group kompanııasy «Kúndelik (Kundelik)» JShS bergen ótinishti qanaǵattandyrý jáne qamtamasyz etý sharalaryn qoldaný týraly sot sheshimine qatysty túsinik berdi.
13 qańtarda Almatynyń mamandandyrylǵan aýdanaralyq ekonomıkalyq soty qalalyq bilim basqarmasyna, sondaı-aq oǵan qarasty aýdandyq bólimderge, mektepter men bilim berý uıymdaryna BilimClass platformasyna nemese «Kúndelik» avtomattandyrylǵan júıesiniń ornyna ózge de aqparattyq júıelerge kóshýge, engizýge, aýystyrýǵa, testileýge nemese pılottyq rejımde paıdalanýǵa baǵyttalǵan kez kelgen áreketterdi jasaýǵa tyıym salǵan edi.
Bilim Group málimetinshe, qazirgi ýaqytta Almatydaǵy 225 mektep BilimClass platformasynda shtattyq rejımde jumysyn jalǵastyryp keledi. Kompanııa dereginshe, oqý úderisi úzdiksiz júrip jatyr, al derekterdiń saqtalýy men paıdalanýshylardyń aqparattyq qaýipsizdigi tolyq kólemde qamtamasyz etilgen.
– Qazaqstan Respýblıkasynyń Azamattyq is júrgizý kodeksine sáıkes, kompanııa óz zańdy múddelerin qorǵaý jáne túpkilikti sot aktilerine qol jetkizý maqsatynda barlyq sot satysyna júginý quqyǵyn saqtaıdy. Internette taralyp jatqan aqparat shyndyqqa janaspaıdy. Іs boıynsha túpkilikti sot sheshimi áli qabyldanǵan joq, - dep málimdedi kompanııa ókilderi.
Aıta keteıik, sottyń bul uıǵarymyn 10 jumys kúni ishinde Almaty sotynda daýlaýǵa bolady.
Jyl basynan beri qoǵamda Almatydaǵy jalpy bilim beretin mektepterdiń Kundelik tsıfrlyq bilim berý platformasynan BilimClass júıesine kóshýi qyzý talqylanyp jatyr. Kazinform agenttigi tilshisi osy máseleniń mán-jaıyn anyqtaýǵa tyrysty.
