Kundelik-ten oqýshylar dereginiń taralýyna baılanysty tergeý júrip jatyr

ASTANA. KAZINFORM — Jasandy ıntellekt jáne tsıfrlyq damý vıtse-mınıstri Dmıtrıı Mýn Kundelik júıesinen mektep oqýshylary derekteriniń taralyp ketýine qatysty túsinikteme berdi. 

— Buǵan deıin bizdiń vedomstvo aıtqandaı, qazir tergeý júrip jatyr. Іs áli aıaqtalǵan joq. Osy is aıasynda barlyq esep-qısap usynylady, — dedi ol Senat otyrysynan keıin BAQ ókilderiniń saýalyna oraı.

Onyń aıtýynsha, Kundelik memlekettik júıe emes. Ol jeke kompanııaǵa tıesili.

— Tıisti sharalar aldaǵy ýaqytta mundaı jaıt qaıtalanbas úshin ýaqytyly ári jedel túrde qabyldandy. Barlyq kemshilik eskeriledi, — dedi vıtse-mınıstr.

Dmıtrıı Mýn aqparattyq qaýipsizdik salasyna qoıylatyn talap únemi jańartylyp otyratynyn aıtady.

— Júıe máselen ár jarty saıyn tolyqtyrylyp otyrady. Zańǵa sáıkes ár tolyqtyrýdan keıin tıisti synaqtan ótýi qajet. Osy aıasynda barlyq talaptyń, aqparattyq qaýipsizdikti saqtaý týraly zańnyń oryndalǵanyna saraptama jasalady, — dedi ol.

Vıtse-mınıstrdiń atap ótýinshe, mınıstrlik aqparattyq qaýipsizdik salasyndaǵy saıasatty qalyptastyrýǵa jaýap beredi. Al bekitilgen erejeler men talaptardyń saqtalýyna tsıfrlyq nysan ıesi tikeleı jaýapty.

Esterińizge sala ketsek, taıaýda áleýmettik jelilerde qazaqstandyq Kundelik elektrondy kúndeliginiń paıdalanýshylaryna qatysty derekter bazasy ınternette tarap ketti degen aqparat jarııalanǵan edi.