Kundelik-ten myńdaǵan oqýshynyń derekter bazasy ınternette tarap ketkeni ras pa

ASTANA. KAZINFORM — Búgin áleýmettik jelilerde qazaqstandyq Kundelik elektrondy kúndeliginiń paıdalanýshylaryna qatysty derekter bazasy ınternette tarap ketti degen aqparat paıda boldy. 

Telegram arnalarda jazylǵan derekterge qaraǵanda, olardyń ishinde oqýshylardyń aty-jóni, týǵan kúni, bilim berý uıymdarynyń ataýy men synyby kórsetilgen.

Osyǵan qatysty «Kúndelik (Kundelik)» JShS resmı túsinikteme berdi. 

- Jeke derekterdiń tarap ketkendigi týraly aqparat anonımdi Telegram-arnasy arqyly jaıylýda. Mundaı arnalar óz kezeginde jarııalaǵan málimetter úshin jaýapkershilik almaıdy.

Qazirgi ýaqytta Kundelik júıesinen derekterdiń tarap ketý faktisi rastalmaǵan. Kompanııa tıisti ishki tehnıkalyq tekseris júrgizýde. Tekserý aıaqtalǵanǵa deıin oqıǵanyń sebebi men aýqymy týraly kez kelgen aqparat merziminen buryn jasalǵan bolyp tabylady, - delingen kompanııanyń málimetinde.

«Kúndelik (Kundelik)» JShS tekserý qorytyndysy boıynsha qoǵamdy qosymsha habardar etetinin de habarlady.

Aıta keteıik, buǵan deıin Mańǵystaý polıtsııasynyń bastyǵy týraly feık aqparat taraǵany habarlanǵan bolatyn.