Kúndegi iri qubylys Jerdiń magnıt órisine áser etedi
ASTANA. KAZINFORM — Kúnde kóldeneń qımasynyń dıametri shamamen 1 mıllıon shaqyrym bolatyn alyp koronaldyq tesik paıda boldy. Astrofızıkterdiń boljamynsha, búgin túnde Jer turǵyndary kúshti magnıttik daýylǵa tap bolýy múmkin, dep habarlaıdy BelTA.
Koronaldyq tesikter — Kún atmosferasyndaǵy plazmanyń tyǵyzdyǵy men temperatýrasy tómen aımaqtar. Mundaı qubylystar kún jeliniń jyldamdyǵyn arttyrady. Al kún jeli Jerdiń magnıtosferasyna áser etedi.
Kúshti magnıttik daýyldar elektrondyq qurylǵylardyń jumysyna kedergi keltirýi múmkin. Atap aıtqanda, navıgatsııalyq júıeler baıaý jumys istep, qatelikter jiberýi yqtımal. Sondaı-aq qysqa tolqyndy radıobaılanys sapasy nasharlaıdy.
— Alǵashqy soqqy magnıttik daýyl týdyrýy múmkin. Koronaldyq tesik úlken bolǵandyqtan, aldaǵy 5-7 kúnde Jerdiń magnıt órisi jalpy turaqsyz kúıde bolady, — dedi Reseı Ǵylym akademııasy P. N. Lebedev atyndaǵy Fızıka ınstıtýtynyń astrofızıgi, fızıka-matematıka ǵylymdarynyń doktory Sergeı Bogachev.
Al magnıttik daýyldardyń adam densaýlyǵyna áseri týraly boljamdarǵa ǵalymdar kúmánmen qaraıdy. Soǵan qaramastan, kóptegen adam bas aýrýyn, bas aınalýyn, qan qysymynyń aýytqýyn, júrek soǵysynyń jıileýin jáne uıqynyń buzylýyn magnıttik daýyldarmen baılanystyrady.
Buǵan deıin Jerde G2 deńgeıindegi magnıttik daýyl tirkeldi.
