Kúndegi ózgerister spýtnıkter men baılanysqa áser etýi múmkin

ASTANA. KAZINFORM – Kúnde shamamen eki aptaǵa sozylǵan tynysh kezeńnen keıin belsendilik kúrt artqany baıqaldy, dep habarlaıdy Kazinform.

Astronomııalyq baqylaýlar deregine sáıkes, Kún tájiniń soltústik jáne ońtústik bólikterinde bir mezgilde qos protýberanets atqylaýy tirkelgen. Sonymen qatar rentgendik sáýlelenýdiń fondyq deńgeıi shamamen eki esege ósip, qaıtadan «C» klasyna jetken.

– Baqylaý nátıjeleri Kúndegi belsendiliktiń qaıta jandana bastaǵanyn kórsetedi. Protýberantstardyń qosarlanǵan atqylaýy men rentgendik sáýlelenýdiń artýy protsesterdiń kúsheıý yqtımaldyǵyn bildiredi, – delingen mamandar málimetinde.

Ǵalymdardyń aıtýynsha, qazirgi ýaqytta negizgi belsendi aımaq Kún dıskisiniń shyǵys shetinde ornalasýy múmkin. Alaıda bul qubylystyń naqty damý stsenarııi ázirge belgisiz.

– Sarapshylar eki yqtımal stsenarııdi qarastyryp otyr: belsendilik jaqyn kúnderi báseńdeýi múmkin nemese kerisinshe kúsheıip, protsesterdiń tabıǵatyn naqtyraq anyqtaýǵa múmkindik beredi, – dep atap ótilgen.

Mamandar Kúndegi mundaı qubylystar radıobaılanysqa kedergi keltirip, spýtnıkterdiń jumysyna áser etýi múmkin ekenin eskertedi.

Aıta keteıik, buryn Jerge magnıttik daýyldar áser etýi múmkin ekeni habarlanǵan.