Kúndegi qýatty jarqyl Jer mańynda radıatsııalyq daýyl týǵyzdy
ASTANA. KAZINFORM — Kúnde qýatty jarqyl tirkeldi. Onyń áseri juldyzdyń Jerge kórinbeıtin betinde bolǵanyna qaramastan, bizdiń ǵalamsharǵa jetýi múmkin, dep habarlaıdy Kazinform agenttigi Reseı ǵylym akademııasynyń Ǵaryshtyq zertteýler ınstıtýty janyndaǵy Kún astronomııasy zerthanasyna silteme jasap.
Ǵalymdardyń málimetinshe, belsendiliktiń kózi 4436 nómirli kún daqtary toby bolǵan.
Bul aımaq birneshe kún buryn Jerge qarama-qarsy ornalasqan.
Jarqaldan paıda bolǵannan keıin mamandar Jer mańynda ortasha deńgeıdegi radıatsııalyq daýyldy jáne Kún bólshekteri aǵynynyń kúrt artqanyn tirkedi.
Ǵalymdar Kúndegi jarqyldyń áseri juldyzdyń arǵy betinen Jerge jetýi múmkin bolǵanyn erekshe jaǵdaı dep baǵalap otyr.
Aldyn ala derekterge sáıkes, zarıadtalǵan bólshekter Kúndi aınalyp ótip, Jerge jetken bolýy yqtımal.
Mamandar qubylysty zertteýdi jalǵastyryp jatyr.
Qazirge deıin Kúnniń Jerge kórinetin bóliginde osyndaı jarylys belgileri anyqtalmaǵan.
Eske salsaq, Kún jarylystary rentgen sáýlesiniń qýatyna qaraı A, B, C, M jáne X sanattaryna bólinedi.
Mundaı qubylystar Jerde magnıttik daýyl týǵyzyp, energetıkalyq júıelerdiń jumysyna áser etýi múmkin.
Sondaı-aq olar qustar men janýarlardyń kóshi-qonyna yqpal etip, polıarlyq shuǵyla baıqalatyn aýmaqty keńeıtedi.
Buǵan deıin magnıttik daýyldardyń adam aǵzasyna áseri týraly habarlanǵan edi.
Osyǵan deıin qańtar aıy magnıttik daýyldar boıynsha on jyldyq rekord ornatqany týraly jazdyq.
