Kúnde energetıkalyq sýsyn ishken: Almatyda jasóspirim aýrýhanaǵa tústi

ALMATY. QazAqparat – Almatyda 17 jastaǵy jasóspirim aýyr halde aýrýhanaǵa jetkizildi. Anyqtalǵandaı, ol jarty jyldan astam ýaqyt energetıkalyq sýsyndar iship, fastfýdpen tamaqtanǵan, dep habarlaıdy QazAqparat tilshisi.

Almaty qalalyq Densaýlyq saqtaý basqarmasynyń málimetinshe, naýqas №2 qalalyq balalar klınıkalyq aýrýhanasyna «gemofılııa V» dıagnozymen túsken. Buryn jasóspirimge qannyń uıýynyń IX faktorynyń tómen deńgeıi dıagnozy qoıylǵany anyqtaldy.

Tekserý kezinde jasóspirimnen joǵary temperatýra, erinniń qanaýy, aýyz qýysynyń jaralary, býyndardyń aýyrýy jáne murynnan qan ketý baıqaldy. Jasóspirim júre almaǵandyqtan, ony arbamen ákelgen.

«Almaty qalasy boıynsha tájirıbeli dáriger – bas balalar gematology, №2 balalar aýrýhanasy gematologııa bóliminiń meńgerýshisi Uljalǵas Óskenbaeva jigittiń IX faktor kórsetkishi gemofılııanyń ortasha aýyr túrine sáıkes keletinin eskertti. Biraq 17 jyl ishinde gemofılııanyń belgileri erterek paıda bolar edi. Sonymen qatar VII faktordyń tómendeýi baıqalǵan. Jasóspirimde koagýlogramma boıynsha gemofılııaǵa sáıkes kelmeıtin mehanızmniń ishki jáne syrtqy buzylýlary bar», - dep habarlady vedomstvodan.

Jasóspirimniń aýrý anamnezimen tanysqannan keıin dáriger úsh jyl buryn oǵan ota jasalǵanyn bildi. Biraq operatsııa barysynda gemofılııaǵa tán aýyr nemese toqtaýsyz qan ketý bolmaǵan.

«Sóılesý kezinde jasóspirim energetıkalyq sýsyndardy kúndelikti ishkenin bildik. Ol alty aı boıy energetıkalyq sýsyn iship, fast-fýdpen tamaqtanǵan. Saldarynan baýyr jumysy nasharlaǵan. Biz balaǵa dıagnoz qoıdyq: Baýyr qyzmetiniń buzylýy. Baýyrdaǵy koagýlıatsııa faktorlary sınteziniń buzylýy. ıAǵnı, protrombındik keshendi faktorlardyń júre paıda bolǵan tapshylyǵy. Gemofılııa dıagnozy rastalmady. K vıtamınin engizý jáne ony tolyqtyrý arqyly emdeý júrgizildi»,- dedi Uljalǵas Aıtjanova.